«Հունվարի 1-ից ուժի մեջ է մտնում ծխախոտային արտադրատեսակների, դրանց պատկանելիքների, փոխարինիչների հրապարակային ցուցադրման արգելքը վաճառասրահներում ու հանրային սննդի օբյեկտներում՝ բացառությամբ օդանավակայանի անմաքս առեւտրի խանութների»,-կառավարության այսօրվա նիստում ասաց առողջապահության նախարար Անահիտ Ավանեսյանը՝ նշելով, որ ուժի մեջ է մտնում նաեւ դրանց գովազդային ցուցադրության արգելքը:
Նախարարը հայտնեց, որ Հայաստանում 16 տարեկանից բարձր բնակչության 27,9 տոկոսը ծխում է, որոնց գերակշռող մասը տղամարդիկ են:
Անահիտ Ավանեսյանի կարծիքով, խստացումները կնպաստեն, որպեսզի երիտասարդների շրջանում ծխախոտի օգտագործումը նվազի. «Առաջներում, կրպակներում շատ տեսանելի վայրերում ծխախոտի տուփերը, մակետները ցուցադրելու միջոցով ակտիվ գովազդ էր տարվում»:
Նիստ վարող վարչապետ Նիկոլ Փաշինյանը պարզաբանեց, որ այսուհետ առօրյայում, սուպերմարկետներում, վաճառքի այլ կետերում ծխախոտի տուփ չենք տեսնելու՝ ո՛չ մեծ, ո՛չ փոքր, ո՛չ նկարած. «Այսինքն՝ վիզուալ առումով ծխախոտի տուփը հանրային կյանքում վերանում է: Եթե խորհրդային ժամանակներից հայտնի բառապաշարով խոսենք՝ ծխախոտը պետք է տակից վաճառեն: Ես մեր երեխաներին ու ոչ միայն երեխաներին կոչ եմ անում տներում էլ արգելել ծխախոտի օգտագործումը»:
Կարդացեք նաև
Նիկոլ Փաշինյանն ասաց, որ շուտով՝ մարտ ամսից արգելվելու է ծխախոտի օգտագործումը բոլոր փակ տարածքներում, անգամ բացօթյա սրճարաններում: Նա նաեւ կոչ արեց երեխաներին՝ արգելել ծնողներին տանը ծխել:
Լուսինե ԲՈՒԴԱՂՅԱՆ
