Սահմանադրական բարեփոխումների խորհրդի եւ հանձնաժողովի համատեղ առաջին նիստում այսօր, երբ քննարկվում էր ՀՀ կառավարման համակարգն առաջնահերթ քննարկման առարկա դարձնելու հարցը, ՀՀ արդարադատության նախարար Կարեն Անդրեասյանը հայտարարեց՝ նախկինում այս մասին չի բարձրաձայնել, որպեսզի կանխորոշումներ չանի, բայց հիմա իրեն թույլ է տալիս մասնագիտական կարծիք ասել․ «Հասկանում եմ, որ ձեւակերպումները պայմանական են, բայց, ի վերջո, կան «ավելի խորհրդարանական», «ավելի նախագահական» եւ «ավելի կիսանախագահական» մոդելներ։ Հետեւաբար, պարզ է, որ բոլորս հասկանում ենք՝ մեկնաբանությունները տարաբնույթ են, բայց ինչ-որ պահի պետք է հիմք ընտրենք»։
Նա հավելեց․ «Պաշտոնապես իմ եւ նախարարության անունից եմ ասում, եւ ոչ կառավարության․ կառավարությունում դեռ չեմ ճշտել, բայց անձամբ իմ անունից ասում եմ, որ ես կողմ եմ խորհրդարանական կառավարման մոդելի պահպանմանը եւ այդ մոդելում շտկումների, բարեփոխումների իրականացմանը»։
Ապա նախարարը նշեց՝ խորհրդի 11 անդամներից այս պահին 3-ը բացակա են, իսկ մյուս 3-ը հրաժարվեցին այս պահին կառավարման ձեւի մասին դիրքորոշում հայտնել․ «Չորսը հստակ կողմ արտահայտվեցին խորհրդարանական մոդելին՝ որոշակի մասնագիտական վերապահումներով, եւ մեկը հանդես եկավ որպես նախագահական մոդելի կողմնակից։ Սա ամփոփումն է եւ ոչ մի բան չի կանխորոշում»։
Կարդացեք նաև
Լուիզա ՍՈՒՔԻԱՍՅԱՆ
