Վրաստանը ԵՄ-ի թեկնածուի կարգավիճակ ստանալու համար դիմել է մարտի 3-ին՝ Մոլդովայի հետ նույն օրը, Ուկրաինայից ընդամենը մի քանի օր անց։ Միաժամանակ մեկնարկը, սակայն, չհանգեցրեց նույն արդյունքի. Եվրահանձնաժողովի որոշմամբ Վրաստանը մեկ քայլ հետ է։ Երկրին առաջարկվել է անդամակցության հեռանկար, սակայն թեկնածուի կարգավիճակը՝ մերժվել:
«Ընտրությունների հետ կապված խնդիրներ էին առկա: Խնդիրներ էին առկա նաև խոսքի ազատության, կոռուպցիայի դեմ պայքարի, Վրաստանում օլիգարխների ազդեցության և հատկապես նրանցից մեկի հետ։ Հարձակումներ են եղել ԼԳԲՏ համայնքի անդամների վրա: Մոտ մեկ տարի առաջ տեղի է ունեցել հարձակում, որը կառավարությունը չի կանխել և իրական քայլեր չի ձեռնարկել մեղավորներին պատասխանատվության ենթարկելու համար: Այսպիսով, մենք խոսում ենք խնդիրների մի ամբողջ շարքի մասին»,- «Ամերիկայի Ձայն»-ին տված հարցազրույցում ասել է Վուդրո Վիլսոնի կենտրոնի աշխատակից, Վրաստանում ԱՄՆ նախկին դեսպան Քենեթ Յալովիցը։
ԵՄ բացատրության մեջ ուղղված Թբիլիսիին ընդհանուր առմամբ առկա են 12 կետեր։ Առաջինը քաղաքական բևեռացումն է։ Այս դիտողությունը նորություն չէ. 2020 թվականի խորհրդարանական ընտրություններից հետո երկրում սկսվեց սուր ճգնաժամ։ Դրանց հաղթողը իշխող «Վրացական երազանք» կուսակցությունն էր, սակայն ընդդիմադիր «Միացյալ ազգային շարժումը» հայտարարեց զանգվածային կեղծիքների մասին և չճանաչեց արդյունքները։ Կողմերի միջև կամուրջներ կառուցելու փորձեր արվեցին ամենաբարձր մակարդակով։ Անցյալ տարվա ապրիլին Եվրոպական խորհրդի նախագահ Շառլ Միշելի միջնորդությամբ փոխզիջում է ձեռք բերվել ճգնաժամից դուրս գալու շուրջ։ Սակայն մի քանի ամիս անց առաջարկը մերժվեց իշխող կուսակցության կողմից։ ԵՄ-ի հետ հարաբերություններն էլ ավելի սրվեցին նախկին նախագահ Միխեիլ Սաակաշվիլիի ձերբակալությունից հետո։ Անցած շաբաթվա Եվրահանձնաժողովի հայտարարությունը միանշանակ ազդանշան է՝ Թբիլիսիից ակնկալում են քաղաքական միասնություն։
«Վրաստանին առաջարկվող տասներկու կետերը բավականին կոնկրետ են։ Եվ ես կարծում եմ, որ այժմ իսկապես եկել է Վրաստանի քաղաքական միավորման ժամանակը,- Ամերիկայի ձայնին տված հարցազրույցում ասել է Լիտվայի նախկին արտգործնախարար Լինաս Լինկևիչյուսը։- Նրանք պետք է գիտակցեն, որ առաջնահերթություններ կան ազգի, ժողովրդի և պետության համար։ Եվ չնայած հակասություններին, նրանք պետք է համախմբվեն ու կենտրոնանան կարեւոր գործերի վրա»։
Կարդացեք նաև
Ոչ վաղ անցյալում Վրաստանը համարվում էր առաջատար տարածաշրջանում բարեփոխումների և ժողովրդավարական զարգացումների տեմպերով։ Եվ նույնիսկ այժմ, օրինակ, «Թրանսփարենսի Ինթերնեշնլ»-ի վարկանիշում, որը չափում է կոռուպցիայի մակարդակը, Վրաստանի ցուցանիշը գրեթե երկու անգամ գերազանցում է Մոլդովային և Ուկրաինային։ ԵՄ-ն այս հաջողությունները չի անտեսում և, այնուամենայնիվ, քայլ առաջ է անում՝ առաջարկելով անդամակցության հեռանկար։ Սակայն, փորձագետների կարծիքով, երբեմն որոշիչ դեր է խաղում երկրի շարժման վեկտորը։
Մանրամասները՝ սկզբնաղբյուր կայքում:
