ԱԺ նախկին պատգամավոր, փաստաբան Զարուհի Փոստանջյանին այսօր ցերեկը Հատուկ քննչական նախկին ծառայության մերձակայքից ոստիկանները ուժ կիրառելով բերման են ենթարկել ու տարել Արաբկիր բաժին:
Տեղի ունեցածը տիկին Փոստանջյանը Aravot.am-ին մեկնաբանեց այսպես.
«Տրամադրությունս եւ օրս փչացրին: Առաջին ատյանի դատարանը արդարացման վճիռ էր կայացրել իմ նկատմամբ հարուցված քրեական գործերից մեկով:
Երեք ժամ եմ մնացել ոստիկանությունում, հետո դուրս եմ եկել: Բերման ենթարկվելիս ձեռքիս տոպրակներ կային: Չգիտեմ, թե ինչից էին վախեցած, բայց ոստիկանությունում ընթերականեր կանչեցին ու տոպրակներս ստուգեցին: Հաստատ արգելված ինչ-որ իրեր էին փնտրում:
Կարդացեք նաև
Երբ բաց էին թողնում, ասացի`ոնց բերել են, այնպես էլ հետ տանեն նույն վայրը: Մերժեցին` ասելով, թե միայն կարող են իմ համար տաքսի կանչել: Բնականաբար, հրաժարվեցի: Դուրս գալուց առաջ պահանջեցի`տալ իմ ձերբակալության արձանագրության պատճենը, որտեղ գրված է, թե, իբր, ոստիկանի կողմից ինձ ներկայացվել է փողոցն ազատելու օրինական պահանջ, ես չեմ ենթարկվել, որի համար էլ ինձ ձերբակալել են:
Իրականում կատարվել է հետեւյալը: Արծրունի եւ Վաղարշյան խաչմերուկը, Կոմիտասի պողոտան Հրաչյա Քոչար փողոցից ոստիկանները փակել էին: Դա իմ ամեն օրվա ճանապարհն է: Մտածեցի, թե պայթյուն կամ վթար է եղել: Ինձ մոտեցավ մի ոստիկան, առաջարկեց ուղեկցել եւ օգնեց անցնել Վաղարշ Վաղարշյան փողոցը: Կարծում եմ, հետին միտք չկար: Դեմս հայտնվեց ՊՊԾ պետը: Ուժայինները կանգնած էին ՀՔԾ -ի առջեւ, իսկ ամբողջ տարածքում բազմաթիվ ոստիկանական ամենագնացներ ու մեքենաներ էին: Պարզվեց, որ նրանք վերահսկում էին Նիկոլ Փաշինյանի անվտանգությունը, որը գնացել էր ՀՔԾ: Ես հարցրի, թե թուրքե՞րն են եկել այստեղ, որ այդքան մեծ ուժերով հավաքվել են, ՊՊԾ պետն ասաց, թե ինչի՞ եմ վիրավորում: Ես էլ պատասխանեցի, թե թուրք բառն իրենց համար վիրավորակա՞ն է, իրենք թուրքերի հետ միասին խաղաղության դարաշրջան չե՞ն բացում: Եվ ՊՊԾ պետը, որի անունը, եթե չեմ սխալվում, Սարգիս Հովհաննիսյան է, հրահանգեց ինձ բերման ենթարկել: Սա է եղելությունը»,- ասաց Զարուհի Փոստանջյանը:
Աշոտ ՀԱԿՈԲՅԱՆ
