Aravot.am-ը ՀՀ քննչական կոմիտեի նախագահի մամուլի քարտուղար Գոռ Աբրահամյանից հետաքրքրվել էր՝ արդյոք «Քինգ Մարշալ» ՍՊԸ-ի կողմից սերտիֆիկատներ կեղծելու վերաբերյալ Քննչական կոմիտեում քրեական վարույթ է նախաձեռնվել։
Հիշեցնենք , որ Aravot.am-ի տեղեկություններով, Հ1-ի գործադիր տնօրեն Հովհաննես Մովսիսյանից ՔՈԳ վարչություն ստացվել էր հանրային անվտանգության պաշտպանության ծառայությունների ձեռքբերման մրցույթի շրջանակում «Քինգ Մարշալ» ՍՊԸ-ի կողմից հրավերով սահմանված՝ ղեկավար անձնակազմի հակաահաբեկչական որակավորումը հավաստող փաստաթղթերի իսկության վերաբերյալ գրություն եւ կից հավաստագրեր, նաեւ ՀՀ ԱԱԾ-ի կողմից էին ստուգումներ իրականացվել, եւ առերևույթ հանցանքի մասին կազմված հաղորդումն ուղարկվել էր ՀՀ քննչական կոմիտեի Երևան քաղաքի քննչական վարչություն՝ քրեական վարույթ նախաձեռնելու հարցը որոշելու համար:
«Նշված հաղորդման հիման վրա ՀՀ ՔԿ-ում նախաձեռնվել է քրեական վարույթ ՀՀ քրեական օրենսգրքի 456-րդ հոդվածի 1-ին մասի հատկանիշներով։ Վարույթը նոր է նախաձեռնվել»,-հաստատել է Գոռ Աբրահամյանը։
Գոհար ՀԱԿՈԲՅԱՆ