101 տարի առաջ օգոստոսի 4-ին հայ վրիժառու, շուշեցի Հակոբ Մելքումովը Միջին Ասիայում գնդակահարեց Հայոց Ցեղասպանության գլխավոր կազմակերպիչներից Էնվերին։ Հայ մեկ այլ վրիժառու Արտաշես Գեւորգյանի թոռը՝ Արմեն Գեւորգյանը, իր մի խումբ համախոհների հետ հարգանքի արարողություն էր կազմակերպել Երեւանում տեղադրված հայ վրիժառուների ՆԵՄԵՍԻՍ հուշարձանի մոտ։ Հավաքվել էին մտավորականներ, հայրենիքի ներկայով ու ապագայով մտահոգված քաղաքական, հասարակական, ռազմական եւ հանրային գործիչներ, շարքային քաղաքացիներ։
Aravot.am-ի հետ զրույցում Արմեն Գեւորգյանը ասաց․«Մեզ եւ մեր նման մտածողներին թուրքերը եւ նրանց նման մտածողները հաճախ քննադատում են, թե վիրավորում ենք թուրքերի ինքնասիրությունը։ Բայց պետք է հիասթափեցնեմ այդպիսիներին։ Նախ, Թուրքիայի դատարանն էր այդ հանցագործներին մահապատժի դատապարտել, եւ մեր նախնիները ի կատար են ածել հենց Թուրքիայի դատարանի վճիռը։ Բայց դա էլ հարցի երկրորդ կողմն է, եւ այստեղ միայն հայկական գործոնը չէ։ Կատարվել էր ցեղասպանություն ոչ թե եւ ոչ միայն հայերի դեմ, այլ` մարդկության դեմ է ոճրագործություն իրականացվել։ Այնպես որ, Նեմեսիսի վրիժառուները կանխել են նաեւ նոր համամարդկային ոճրագործությունները»։
Աշոտ ՀԱԿՈԲՅԱՆ
