Ի պաշտպանություն արցախահայերի՝ այսօր կեսօրից Երեւանի կենտրոնից քաղաքացիների սկսած համախմբման ակցիան ավարտվեց կառավարության շենքի դիմաց:
«Արդեն մի քանի ժամ է՝ մենք այս խմբով, քաղաքի տարբեր վայրերում այլ խմբեր իրազեկման տարբեր գործողություններ ենք արել: Մեր նպատակն է խոսել հայ մարդու հետ, բացատրել, համոզել, խնդրել: Ով գիտակցում է ստեղծված իրավիճակը, պետք է ընդունի դրանից դուրս գալու ճանապարհը ու ամեն հայ այդ ճանապարհին իր մասնակցությունը պետք է ունենա: Երբ մենք այս հրապարակը կողողենք մեր ներկայությամբ, 100.000 հայ կհավաքվի այս հրապարակում, կկարողանանք փրկել Արցախն ու կկանխենք այն, ինչը թշնամին սկսել է Հայաստանի դեմ՝ օգտագործելով այս ժամանակավոր իշխանությանը»,- եզրափակեց ցույցի մասնակիցներից մեկը:
Հետո նա ցույցի մասնակիցներին կոչ արեց կպնել այս իշխանությունների ցավոտ տեղին. «Եկեք իրենց ամենացավոտ տեղին կպնենք ՝ Արցա՜խ, Արցա՜խ»:
Ակտիվիստները նաեւ տեղեկացրին, որ վաղը ժամը 18:00-ին մեծ հանրահավաք է լինելու Հանրապետության հրապարակում:
Կարդացեք նաև
Կառավարության շենքի դիմաց կանգնած մի կին էլ ասաց, որ ինքն այս հրապարակի համար է եկել, որը, ըստ նրա, մեր տեղացի թուրքերն են տրորում:
Լրագրողները միանգամից հետաքրքրվեցին՝ Արցախի՞ց է, նրա կողքին կանգնած տղամարդը վիրավորվեց հարցից. «Դուք լրագրող եք, էդպիսի հարց տալի՞ս են»:
«Ո՛չ, ես Աշտարակից եմ, ես հա՛յ եմ: Արցախից չեմ: 1988 թվականի փետրվարի 23-ից ես այս հրապարակում կանգնած եմ, վիրահատված, շուբան հագիս, շալով փաթաթված, իսկ հիմա ես եկել եմ սրանցից պաշտպանեմ»,- պատասխանեց հարցի հասցեատեր կինը:
Սակավաթիվ քաղաքացիների՝ կառավարության շենքի դիմաց հավաքվելուց հետո ոստիկանական ուժեր կենտրոնացվեցին այդ հատվածում:
Արփինե ՍԻՄՈՆՅԱՆ
