Հայոց ցեղասպանության թանգարան-ինստիտուտի նախկին տնօրեն Հայկ Դեմոյանի տեղեկություններով՝ «Արևմտյան Ադրբեջան» նախագծին ընդառաջ՝ ԿԳՄՍ-ից «Պատմամշակութային արգելոց-թանգարանների և պատմական միջավայրի պահպանության ծառայությանը» գրավոր հանձնարարական է տրվել՝ Հայաստանի Հանրապետության տարածքում մահմեդական հուշարձանները, առաջին հերթին՝ գերեզմանոցները հաշվառելու և ուսումնասիրելու համար:
Ազգագրագետներ Հրանուշ Խառատյանը և ՀՑԹԻ տնօրեն Հարություն Մարությանը առանձին խոշոր դրամաշնորհային ծրագրով լծվել են ՀՀ տարածքում ադրբեջանական ժառանգության ու ներկայության ուսումնասիրությանը:
Ազգագրագետ Հրանուշ Խառատյանը Aravot.am-ի հետ զրույցում զարմանքով արձագանքեց այս տեղեկություններին:
«Ի՞նչ ընդառաջ, ո՞վ է ընդառաջ գնում այդ նախագծին առհասարակ,ի՞նչ նախագիծ է, որ մենք խոսենք: Վերջին շաբաթվա մեջ ՅՈՒՆԵՍԿՕ-ն Հայաստան էր ուղարկել մի փաթեթ, որ իբրեւ թե Հայաստանում ադրբեջանական հուշարձանների ինքնությունները փոխվում են, դրանք ոչնչացվում են: Իրենք գրել էին, որ իբրեւ թե Արեւմտյան Ադրբեջանում է դա տեղի ունենում: Գիտությունների ազգային ակադեմիան տարբեր ինստիտուտներով ելել էին այդ հիմարության դեմ: Իմ առաջին գրածն այն էր՝ ոնց կարող էր մեր արտգործնախարարությունը վերցներ մի թուղթ, որտեղ գրված է Արեւմտյան Ադրբեջան: Եթե Արեւմտյան Ադրբեջանում ինչ-որ բաներ են տեղի ունենում, ՅՈՒՆԵՍԿՕ-ն պետք է այդ հարցն ուղարկի Արեւմտյան Ադրբեջան, ոչ թե Հայաստան: Ինչ իրավունքով է նախ ՅՈՒՆԵՍԿՕ-ն ուղարկում, ինչ հիմքով կարող է Հայաստանի կառավարությունն այդպիսի փաթեթ ընդունի Արեւմտյան Ադրբեջանի մասին, մենք Արեւմտյան Ադրբեջանի մասին չգիտենք, Հայաստանն ինչ կապ ունի դրա հետ: Այդ փաթեթը մեր կողմից վերցնելը իրավական մեծագույն հանցագործություն է»,- նկատեց ազգագրագետը:
Կարդացեք նաև
Ինչ վերաբերում է ադրբեջանական գերեզմանները հաշվառելուն, Հրանուշ Խառատյանը շարունակեց. «Այո՛, մենք անընդհատ գրում ենք, որ ադրբեջանական գերեզմանները Հայաստանում պահպանվել են այն մակարդակով բացի ժամանակի վնասները: Ինչ որ թողել, գնացել են, լուսանկարներ ունենք, ցույց ենք տալիս, ի՞նչ է մենք դա չպետք է տեսնենք, չպիտի՞ անենք: Այո՛, մենք նկարում ենք այդ հուշարձանները, դրա մասին վերլուծություն ենք տալիս իշխանություններին, բոլոր ժամանակների իշխանություններին, թե պահպանվածության ինչ մակարդակ ունեն դրանք »:
Արփինե ՍԻՄՈՆՅԱՆ
«Արևմտյան Ադրբեջան» անվանումն օգտագործելը՝ ընդառաջ գնալ է Ադրբեջանի իշխանություններին։ «Արցախի Հանրապետություն» անվանումից հրաժարվելն ու դադարել օգտագործելը՝ Ադրբեջանի իշխանություններին ընդառաջ գնալ է,կրկին, նշանակում։ Այստեղ արդեն մեկնաբանություններն ավելորդ են…