Վրաստանի խորհրդարանին չհաջողվեց իմփիչմենթի միջոցով պաշտոնանկ անել երկրի նախագահ Սալոմե Զուրաբիշվիլիին: Իմփիչմենթին կողմ է քվեարկել 86 պատգամավոր, դեմ՝ 1-ը: Ըստ Վրաստանի խորհրդարանի կանոնակարգի, եթե իմփիչմենթին կողմ չի քվեարկել խորհրդարանի ամբողջական կազմի առնվազն երկու երրորդը, տվյալ դեպքում՝ 100 պատգամավոր, ապա հարցը համարվում է հանված:
Այսպիսով, Սալոմե Զուրաբիշվիլին կշարունակի զբաղեցնել երկրի նախագահի պաշտոնը: Հիշեցնենք, որ ավելի վաղ Վրաստանի Սահմանադրական դատարանը բավարարել էր երկրի նախագահին իմփիչմենթի ենթարկելու մի խումբ խորհրդարանականների դիմումը: Դատարանը վճռել էր, որ Զուրաբիշվիլին խախտել է երկրի Հիմնական օրենքը՝ արտերկրյա շրջագայությունների մեկնելով առանց կառավարության թույլտվության։
