ՀՀ Հանրային ծառայությունները կարգավորող հանձնաժողովի կայքում հրապարակված է որոշման նախագիծ, որով հանձնաժողովը համաձայնություն է տալիս «ՄՏՍ-Հայաստան» ՓԲԸ-ի նկատմամբ հսկողության փոխանցման գործարքի կնքմանը։
Որոշման նախագծում մասնավորապես ամրագրված է, որ «ՄՏՍ Հայաստան» ՓԲԸ-ն 2023-ի նոյեմբերի 3-ին ՀՀ հանրային ծառայությունները կարգավորող հանձնաժողովին է ներկայացրել ընկերության նկատմամբ հսկողության փոխանցումը համաձայնեցնելու հայտ, որի համաձայն «Ֆեդիլքո Գրուպ Լիմիթիդ» ընկերությունը (Կիպրոսի օրենքների համաձայն գրանցված ընկերություն) ցանկանում է «Արամայո Ինվեսթմենթս Լիմիթեդ» ընկերությունից ձեռք բերել ընկերության բաժնետոմսերի 100 տոկոսը»։
Նշենք, որ Itel.am-ը հիշեցնում է, որ 2023 թվականի ապրիլին ՀՀ Մրցակցության պաշտպանության հանձնաժողովն արգելել էր «Ֆեդիլքո Գրուպ Լիմիթիդ» ընկերությանը ձեռք բերել «ՄՏՍ Հայաստան» ՓԲԸ-ի բաժնետոմսերը: Ապրիլին, երբ հրապարակվեց այս որոշումը, դրանում մասնավորապես ամրագրված էր․ «Գործարքի համաձայնեցումը կարող է մերժվել, եթե համաձայնություն ստանալու համար ներկայացված փաստաթղթերը և (կամ) տեղեկատվությունը չեն համապատասխանում Հանձնաժողովի սահմանված կարգի պահանջներին, ինչպես նաև իրավասու մարմնի գնահատմամբ վնասում է կամ կարող է վնասել ազգային անվտանգությանը կամ պետական շահերը»։
Մինչդեռ այս նախագծով, որը հավանաբար կհաստատվի հանձնաժողովի առաջիկա նիստի ընթացքում, ամրագրված է․ «ՀՀ բարձր տեխնոլոգիական արդյունաբերության նախարարությանն ուղղված Հանձնաժողովի 2023 թվականի նոյեմբերի 7-ի գրությանն ի պատասխան վերջինս 2023-ի նոյեմբերի 9-ի գրությամբ հայտնել է, որ գործարքի կայացման վերաբերյալ իր իրավասությունների շրջանակում առարկություններ չունի՝ գրությանը կից ներկայացնելով հայտի առնչությամբ դիտողություն չունենալու վերաբերյալ ՀՀ ԱԱԾ դիրքորոշումը»։
Կարդացեք նաև
Տաթև ՀԱՐՈՒԹՅՈՒՆՅԱՆ
