Aravot.am-ը գրավոր հարցում էր ուղարկել՝ ԿԳՄՍ նախարար Ժաննա Անդրեասյանի անունով, խնդրել ենք պատասխանել՝ իսկապես այդ մանկավարժները գոյություն ունե՞ն, որոնք առաջարկել են Հայոց պատմություն առարկան վերափոխել Հայաստանի պատմության, եթե այո, ո՞ր մարզում, ո՞ր քաղաքում կամ գյուղում են աշխատում, ի՞նչ առարկայի մասնագետներ են, ի՞նչ տեսքով են իրենց առաջարկը ներկայացրել՝ բանավո՞ր, գրավո՞ր, անձա՞մբ են եկել ԿԳՄՍ նախարարություն, կառավարություն եւ քանի՞ մանկավարժ է նման առաջարկով դիմել:
ԿԳՄՍ նախարարությունից ստացել ենք գրավոր պատասխան՝ ստորագրված փոխնախարար Արաքսիա Սվաջյանի անունով, որտեղ մասնավորապես ասվում է. «ՀՀ ԿԳՄՍ նախարարությունը լիազորված չէ հայտնելու «Հայաստանի Հանրապետության կառավարության 2010 թվականի ապրիլի 8-ի N 439-Ն որոշման մեջ փոփոխություն կատարելու մասին» ՀՀ կառավարության որոշման նախագծով կատարվող փոփոխության առաջարկ ներկայացրած մասնագետների անունները: Վերջիններս կարող են հրապարակային հանդես գալ իրենց իսկ համաձայնությամբ և նախաձեռնությամբ»:
Հիշեցնենք, որ նույն հարցով դիմել էինք նաեւ ՀՀ վարչապետի մամուլի քարտուղար Նազելի Բաղդասարյանին եւ խնդրել այդ ուսուցիչների տվյալները, որպեսզի հնարավորություն ունենանք հարցազրույց վարել նրանց հետ եւ լսել նրանց հիմնավորումները, սակայն նա եւս չէր տրամադրել եւ ընդամենն ասել էր, թե ճշտել է վարչապետից, որ առարկան վերանայելու առաջարկը եղել է տարբեր ձեւաչափերում եւ մասնավոր զրույցներում:
Մենք շարունակում ենք փնտրել այդ մանկավարժներին, կրկին պատրաստ ենք լսել Հայոց պատմությունը Հայաստանի պատմության փոխելու առաջարկ ներկայացրած ուսուցիչների տեսակետները՝ հույս ունենալով, որ նրանք հրապարակային հանդես կգան, ինչպես նշել է ԿԳՄՍ փոխնախարարը:
Կարդացեք նաև
Ինչ վերաբերվում է տիկին Սվաջյանին, նա վերջերս կանխակալ կարծիք էր հայտնել թեմայի վերաբերյալ՝ նշելով. «Մենք այսօր Հայք չունենք, մենք ունենք Հայաստան եւ բնականաբար ուզում ենք, որ մեր երեխաները Հայաստանի պատմությունն ուսումնասիրեն»:
Գոհար ՀԱԿՈԲՅԱՆ
