Քաղաքագետ Հրանտ Տեր-Աբրահամյանի ֆեյսբուքյան գրառումը
Մի փոքր պարզաբանում նախորդ գրառմանս հետ կապված:
Գրել էի, որ «Մարտական եղբայրության» անդամներ Ավետիս Ավետիսյանին ու Հենրիկ Մկրտչյանին այժմ ուղեկցում են Նոյեմբերյանի ոստիկանության բաժանմունք՝ Վերին Ոսկեպարի տարածք այցելելու համար, ինչն, իբր, անօրինական է: Չնայած այդ տարածք այցելել ենք նախկինում և մենք, և շատ այլ մարդիկ: Բայց տվյալ դեպքում դա չի նույնիսկ հարցը:
Մեզ համար պարզ է, որ հրահանգը եկել է ոչ թե Նոյեմբերյանից, այլ Երևանից: Արդեն տևական ժամանակ է, որ մեր բոլոր այցերի մասին Նոյեմբերյանի տեղի ուժայինները նախապես տեղյակ են լինում և համապատասխան զգուշացման աշխատանքներ տանում տեղացիների հետ:
Մենք Հայաստանի օրինապաշտ քաղաքացիներ ենք, և որևէ բան ցայսօր չենք արել օրենքից դուրս և, բնականաբար, չենք էլ նախատեսում անել:
Եվ մենք հարց ենք տալիս ՀՀ ղեկավարությանը, որի հրահանգավորմամբ մեր տղաներին չեն թողնում այցելել Վերին Ոսկեպար, ՀՀ ո՞ր օրենքով կամ ո՞ր իրավական հիմքով է արգելված ՀՀ քաղաքացու կամ հատկապես «Մարտական եղբայրության» այցելությունը Վերին Ոսկեպար: Մանավանդ, որ այդտեղ այցելողներ այսպես թե այնպես լինում են:
Կարդացեք նաև
Նաև ավելացնեմ, որ մենք այս իրավիճակից բացարձակապես ընկճված չենք:
Ենթադրել, որ «Մարտական եղբայրության» անդամներին, որոնց մեծ մասն անցել է պատերազմով կամ քաղաքական պայքարով, կարելի է վախեցնել ոստիկանությամբ, շատ միամիտ է:
Բականաբար, մենք շարունակելու ենք անել մեր գործն այնպես, ինչպես ճիշտ ենք համարում ՀՀ օրենքների սահմաններում:
Այնպես որ կոչ եմ անում անիմաստ ժամանակ չվատնել մեզ «վախեցնելու» վրա: Մանավանդ որ ներկա ղեկավարությունից շատերն անձամբ ճանաչում են թե՛ ինձ, թե՛ մեր մյուս անդամներից շատերին: Ես հուսամ, մեզ անձամբ ճանաչողները լուրջ չեն մտածում, որ մեզ հետ հնարավոր է նման լեզվով խոսել ու «խրատել»:
Մեր նպատակն է հայ ժողովրդին զգուշացնել և տեղյակ պահել վտանգների մասին, ասել ճշմարտությունը և հնարավորինս պատրաստել ինքնապաշտպանությանը:
Շարունակելու ենք հանգիստ և հետևողական զբաղվել դրանով:
Այդ ճանապարհին սպասվող բոլոր զրկանքները մենք, բնականաբար, պատրաստ ենք կրել մինչև վերջ ու որքան որ պետք լինի: