«Մեր մտահոգությունները ու հստակ նպատակներն անընդհատ փորձեցինք քննարկել բնակարանային ծրագիրը վերանայելու հետ կապված և այդ ծրագրի հստակության համար, սակայն մինչ օրս ոչ մի պաշտոնական պատասխան չունեցանք»,- «Արցախի ժողովրդի կարիքների բավարարում․ ընթացիկ զարգացումները, խնդիրներն ու լուծումները» թեմայով «Մեդիա կենտրոնում» հրավիրված մամուլի ասուլիսի ժամանակ այսպիսի մտահոգություն հայտնեց Արցախի ժողովրդի կարիքների ապահովման նախաձեռնության ներկայացուցիչ Սոնա Համբարձումյանը։
Նա հայտնեց, որ մարտի 20-ի հանրահավաքի արդյունքում ընդունված հայտարարության տեքստը, բովանդակությունը հանրագրի տեսքով մարտի 21-ին ներկայացրել են ՀՀ կառավարությանը․ «Ցավով նշեմ, որ հանրագրերի մասին օրենքի համաձայն՝ հանրագիրը ստանալուց ոչ ուշ, քան հինգ աշխատանքային օրվա ընթացքում հանրային, էլեկտրոնային հարթակում ոչ հրապարակվեց մեր հանրագիրը, ոչ վերադարձվեց, ոչ էլ իր պատասխանը գտավ։ Մենք բազմաթիվ դիմումներ ենք ուղղել ՀՀ կառավարությանը մեզ հետ քննարկել մեր տրված առաջարկները։ Մարտի 27-ին նամակ-դիմումներով դիմեցինք ՀՀ ԱԺ երեք խմբակցություններին՝ առաջարկելով խորհրդարանական լսումներ կազմակերպել այս հարցի շուրջ»։
Սակայն այդպես էլ արձագանք չի ստացվել։ Սոնա Համբարձումյանն ասաց, որ իրենց տեսանելի չեն բոլոր այն սկզբունքները, դրույթները, որոնք ՀՀ կառավարությունը անվանում է բնակարանային ապահովման ծրագրի նախագիծ․ «Դա թղթային ձևակերպման ձևով մեր առաջ դրված չէ, որ գտնենք մեր կողմից երևացող թյուրըմբռնումները, դիտողությունները, հետևաբար սա մենք դիտում ենք՝ որպես թյուրըմբռնում, քաղաքացիների՝ ոչ պատշաճ վերաբերմունք հանրային քննարկմանը։ Անընդհատ նշում են, որ քննարկումներից հետո ծրագիրը կհաստատվի։ Դա նշանակում է, որ կա նախագիծ, նախագծի շուրջ են կատարվում հանրային քննարկումները, բայց իրականում արձանագրում ենք, որ նախագիծ՝ որպես այդպիսին նորմատիվ իրավական ակտ գոյություն չունի»։
Կարդացեք նաև
Տաթև ՀԱՐՈՒԹՅՈՒՆՅԱՆ
