Նախագահութեամբ Ն.Ս.Օ.Տ.Տ. Արամ Ա. Կաթողիկոսին եւ ներկայութեամբ հոգեւոր հայրերու, «Արամ Ա. Կաթողիկոս» Հայագիտական Հիմնարկի ուսուցչական կազմին, ներկայ եւ առցանց հետեւող ուսանողներու, ծնողներու եւ հարազատներու, Երկուշաբթի, 29 Յունիս 2026-ի երեկոյեան ժամը 7:00-ին, «Խորէն Ա. Կեդրոն»ի Հայ Եկեղեցւոյ Համալսարանական Ուսանողներու Միութեան սրահէն ներս, Հայագիտական Հիմնարկը իր ամավերջի հանդէսն ու շրջաւարտներու վկագիրներու բաշխումը ունեցաւ:
Բացման խօսքով հանդէս եկաւ Հիմնարկի տնօրէն Ահարոն Շխրտըմեան: Ան անդրադարձաւ Հիմնարկի առաքելութեան, այս տարեշրջանի ձեռքբերումներուն եւ ապագայի տեսլականներուն: Այս առիթով ան իր երախտագիտութիւնը յայտնեց Վեհափառ Հայրապետին, որ իր հայրապետական հովանաւորութիւնը շնորհելու կողքին՝ իր խրախուսանքն ու աջակցութիւնը տեւաբար կը յայտնէ Հիմնարկին տարած աշխատանքներուն եւ ծրագիրներուն:Ա. Շխրտըմեան նաեւ շնորհակալութիւն յայտնեց իր աջակից ուսուցչական կազմին, որուն նուիրուածութեամբ Հիմնարկը իր առաքելութիւնը ապահովաբար յառաջ կը տանի: Աւարտին խօսք ուղղեց շրջանաւարտներուն, որոնք այս օճախին եռամեայ կրթութիւնը ստանալէ ետք, իրենց առածը պիտի ըծայաբերեն իրենց շրջապատին եւ մեր ազգին:
Ապա, շրջանաւարտ դասարանին անունով ուղերձ կարդաց Հելէն Յակոբեան Թօփէեան: Ան յստակօրէն եւ յուզումնախառն ոճով արտայայտուեցաւ այն մեծ ներդրումին մասին, զոր Հայագիտական Հիմնարկը ունեցած է իր կեանքին մէջ. ըստ շրջանաւարտ ուսանողին Հիմնարկը իր ուսանողներուն կը սորվեցնէ տիպար հայեր ըլլալու ուղին, մայրենի լեզուին հանդէպ նախանձախնդրութիւն եւ ազգային մշակութային արժէքներու ու հարուստ ժառանգութեան հետ հարազատ կապուածութիւն: Ան իր խօսքի աւարտին երախտապարտութիւն յայտնեց Վեհափառ Հայրապետին, Հիմնարկի տնօրէնութեան եւ ուսուցչական կազմին:
Հուսկ Արամ Ա. Վեհափառ Հայրապետին ձեռամբ տեղի ունեցաւ վկայագիրներու բաշխումը։ «Արամ Ա. Կաթողիկոս» Հայագիտական Հիմնարկը այս տարի ունեցաւ երկու շրջանաւարտ՝ Նորա Մարտոյեան Պուտաքեան եւ Հելէն Յակոբեան Թօփէեան: Շրջանաւարտները յաջորդաբար մօտեցան Վեհափառ Հայրապետին եւ համբուրելով անոր հայրապետական աջը՝ ստացան իրենց վկայագիրները:
Կարդացեք նաև
Աւարտին, ներկաներուն օրհնութեան խօսք ուղղեց Վեհափառ Հայրապետը, որ գնահատեց Հիմնարկի տնօրէնութիւնն ու ուսուցչական կազմը՝ իրենց տարած ազգանուէր եւ ժրաջան աշխատանքին համար: Հայրապետը յատկապէս շեշտեց հայ Սփիւռքին մէջ սոյն Հիմնարկին գոյութեան կարեւորութիւնը՝ դիտել տալով անոր եզակի ուսումնական հաստատութիւն ըլլալը: Նորին Սրբութիւնը իր խօսքին մէջ բարձրացուց հայոց լեզուի, մանաւանդ Արեւմտահայերէնի պաշտապանութեան հրամայականը. «Հայագիտական Հիմնարկին մէջ յատուկ կարեւորութեան առարկայ պէտք է դառնայ հայոց լեզուն: Հայերէնը այն չէ ինչ որ էր անցեալին. ան սկսած է աղարտիլ ու աղաւաղիլ: Հայերէնը պահելու ենք մաքուր եւ անաղարտ՝ իր քերականութեամբ, ուղղագրութեամբ եւ լեզուամտածողութեամբ»: Իր խօսքի վերջաւորութեան, Վեհափառ Հայրապետը շրջանաւարտներուն յայտնեց իր գնահատանքն ու շնորհաւորութիւնը:
Ամավերջի հանդէսը իր աւարտը գտաւ Հայրապետին արտասանած «Պահպանիչ» աղօթքով ու յիշատակի խմբանկարով:
