«Դիմողների կողմից բազմիցս կատարվեցին փորձեր ընդհանուր առմամբ ապալեգիտիմացնել ԿԸՀ-ի կողմից հրապարակված թվերը։ Եվ ընդամենը 4, թե 5 կոնկրետ տվյալ նշվեց։ Ընդհանուր անհասցե մեղադրանքն՝ առանց կոնկրետացման, նույնն է, որ ես ասեմ օրինակ՝ ՍԴ դիմումներն անհիմն են, քանի որ այնտեղ որոշ տառասխալներ եմ հայտնաբերել։ Եթե կան տառասխալներ, պատկերացրեք՝ ինչքան անպատասխանատու են մոտեցել դիմումների կազմմանը»,-Սահմանադրական դատարանի (ՍԴ) նիստի ժամանակ այսպիսի կարծիք հայտնեց ՔՊ ներկայացուցիչ Սուրեն Գրիգորյանը՝ հակադարձելով ՍԴ դիմում ներկայացնող ուժերի փաստարկներին։
Հիշեցնենք՝ այսօր 6-րդ օրն է, ինչ Սահմանադրական դատարանը քննում է հունիսի 7-ի խորհրդարանական ընտրությունների արդյունքները վիճարկող քաղաքական 7 ուժերի կողմից ներկայացված դիմումները։
Անդրադառնալով «Ուժեղ Հայաստան»-ի ներկայացուցիչ Արամ Օրբելյանի մտահոգություններին, թե քվեաթերթիկները կան, բայց 27000 ստորագրություն պակաս է մատյանում, քան քվեաթերթիկներն են, Սուրեն Գրիգորյանը սա նորմալ համարեց․ «Հնչեց հետևյալ միտքը՝ կարող է լինել իրավիճակ, որ անձը ստորագրել է մատյանում, բայց քվեաթերթիկը չկա, բայց չի կարող լինել իրավիճակ, որ քվեաթերթիկը կա, բայց անձի ստորագրությունը մատյանում չկա։ Շատ լավ էլ կարող է լինել մի պարզ պատճառով, իհարկե՝ չեմ ասում, որ սա ճիշտ ընթացակարգ է։ Անձը մտնում է, սկզբից նույնականացվում է, հետո շրջանցելով մատյանը՝ ստանում քվեաթերթիկ, կատարում քվեարկությունը և քվեաթերթիկը գցում արկղի մեջ։ Քանի որ մասնակցության թիվը հաշվվում է մատյանից, ոչ թե սարքից, կարող է առաջանալ անհամապատասխանություն»։
Կարդացեք նաև
Սուրեն Գրիգորյանը, ամփոփելով իր եզրափակիչ ելույթը, հայտարարեց․ «Պնդում եմ, որ դիմում ներկայացնողների փաստարկներն անհիմն են։ Տեղի չեն ունեցել խախտումներ, որոնք կարող էին ազդել կամ ազդել են քվեարկության արդյունքների վրա, ուստի դիմումներն ամբողջությամբ ենթակա են մերժման»։
ՍԴ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
