ԲՀԿ անդամ Արման Աբովյանը ոչ ուղղակի կապ է տեսնում Գագիկ Ծառուկյանի և այսօր Նիկոլ Փաշինյանի՝ ՌԴ մեկնելու միջև։
«Խուզարկություն անվանե՞մ, խուժանությո՞ւն անվանեմ։ Եթե այս համառությամբ և այս կիսառազմականացված օպերացիաներով պաշտպանվեին ՀՀ շահերը, ապա ավելի լավ և անվտանգ երկիր կունենայինք»,- այսօր լրագրողների հետ զրույցում ասաց Աբովյանը։
Նրա խոսքով՝ ՀՀ-ում այսօր ընդդիմադիր գործիչները ենթարկվում են կատաղի ճնշումների, իսկ ամենակատաղի ճնշումը տանում է դեպի Ծառուկյան։
Կարդացեք նաև
«Ինչի՞ համար է սա արվում։ Սա ֆաշիզմի դրսևորում է ուղղակի։ Իշխանությունը փորձում է ոչ թե լռեցնել, այլ ընդհանրապես չեզոքացնել ընդդիմադիր լիդերներին։ Չեն հասկանում, որ ՀՀ քաղաքացիների բացարձակ մեծամասնությունը մերժել է իրենց, բայց դա չի նշանակում, որ պետք է կատարեն այն հանձնարարականները, որոնք իջեցվել են Բաքվից և Անկարայից։ Կա Սահմանադրության փոփոխման գործընթաց, որը Ադրբեջանում անվանում են Ադրբեջանի Սահմանադրության ներդրում Հայաստանում։ Թող ինչ հեքիաթներ ուզում են պատմեն, սա ուղիղ կապ ունի Ադրբեջանի նպատակների հետ»։
Անդրադառնալով Ծառուկյանի դեմ այսօր վաղ առավոտից սկսված ճնշումներին՝ խուզարկությունների տեսքով, Աբովյանն ասաց, որ դա անակնկալ չէր՝ ոչ Ծառուկյանի, ոչ ԲՀԿ անդամների, ոչ էլ ՀՀ-ում տրամաբանող քաղաքացիների համար։
«Բա ի՞նչ պետք է անեին։ Գործում են հակապետական տրամաբանությամբ։ Հարցն այն է՝ ի՞նչ է արել Ծառուկյանը, որ որոշել են ավտոմատավորներով գնալ նրա մոտ։ Մարդը, ով առավոտից երեկո խոսում էր ՀՀ շահերի, հանրային համերաշխության մասին, դուրս գալու՝ իրար ատելու շրջանից, որակվո՞ւմ է որպես հանցագործ»։
Հիշեցնենք, որ վաղ առավոտից խուզարկություններ են սկսվել Ծառուկյանի առանձնատանը, բիզնեսներում:
Արփինե ՍԻՄՈՆՅԱՆ
