«Մենք ընդլայնված խումբ ենք, որը կարող է առավելություն լինել՝ մրցակցության պայմաններում»,- այսօր ներկայացնելով «Ծառուկյան» դաշինքի առավելությունները՝ «Հայելի» ակումբում ասաց ԲՀԿ անդամ Վարդան Բոստանջյանը:
Aravot.am-ի դիտարկմանը, որ լայն համախմբման մասին եք խոսում, բայց անգամ Գագիկ Ծառուկյանն ընդունեց, որ լայն համախմբում չեղավ, ի՞նչ լայն համախմբման մասին եք խոսում, «Առաքելություն» եւ «Ալյանսն» են ընդամենը՝ նա պատասխանեց. «Գագիկ Ծառուկյանը լայն կոնսոլիդացիա ասեց՝ հանրություն, հասարակություն, քաղաքական ուժեր, հավաքվենք իրար հետ, մեր համակարգը փոխենք: Հիմա որ չեն հավաքվում, փոփոխության համար չկան, հումք չունես դու, ո՞նց անես, արհեստականորեն կոնսոլիդացիա՞ ստեղծես: Հիմա տեսեք էն ավանդական ուժին, էն մյուսին, պարզվում է՝ իրար գզվռտոց է, դուք կուզենա՞ք այդպիսի մարդկանց թողեք ձեր տան մեջ, բա էլ ի՞նչ կոնսոլիդացիայի մասին եք խոսում: Համակարգային մեծ փոփոխություններ կատարելու համար լայն կոնսոլիդացիա է պետք: Մենք չենք ասում՝ հիմա կստեղծենք: Всего навсего 2 մլն-անոց երկիր ենք, հո մենք Չինաստանում չենք գտնվում՝ 1.5 մլրդ-ի կոնսոլիդացնենք»:
Լրագրողների դիտարկմանը, որ մենք մի անգամ տեսել ենք վախեցած Գագիկ Ծառուկյանին, ինչպե՞ս էիք կարողանալու համախմբում իրականացնել՝ Վարդան Բոստանջյանը նեղվեց. «Վախեցած… էդ բառը սազակա՞ն է, որ դուք արտաբերում եք: Պարզապես ձեզ ուզում եք «վոլնի»՝ ազատ զգաք ու բարձրաձայնում եք: Մենք ունեցանք Մարտի 1, 10 զոհեր, որը երբեք չի մոռացվի: Մարդիկ, ինչ էլ կատարվի՝ լավ, թե վատ ապրենք, միշտ հիշելու ենք Մարտի 1-ը: Դուք ասում եք՝ թող տեղի ունենար այդ օրը մի բան, որը Մարտի 1-ից ուժեղ պայթյուն լիներ: Դա արկածախնդրություն կլիներ, իմ կարծիքով»:
Լրագրողները ճշտեցին՝ ո՞վ պետք է կրակեր, եթե արյունահեղություն պիտի տեղի ունենար, կարո՞ղ եք անունն ասել՝ Վարդան Բոստանջյանը պատասխանեց. «Ես որտեղի՞ց իմանամ, ես էդ տեղամասերում չեմ գտնվել»: Այն, որ Գագիկ Ծառուկյանը խոսում է արյունահեղությունից, ուրեմն գիտի, թե ով է կրակողը, իսկ եթե գիտի ու չի անում քայլեր, նշանակում է վախենում է՝ Վարդան Բոստանջյանն ի պատասխան սկսեց լրագրողներին մեղադրել այդ «ուժեղ տրամաբանության», այնուհետեւ նաեւ նրա մեջ, թե ուզում են իբր ուժեղ հարցեր տան, որ հետո գլուխ գովեն, թե շշպռցրել են:
Կարդացեք նաև
Հետո էլ սկսեց լրագրողներին մեղադրել պատվեր կատարելու մեջ. «Ձեզ ուղարկել են…դուք գործ անողին, ստեղծողին մի փնովեք, հասկացա՞ք: Գնացեք գտեք նրան, ով էս բոլորի մեղավորության կենտրոնում է կանգնած»:
Հարցին՝ ձեր կուսակցությունները մտադի՞ր են զբաղվել Մարտի 1-ով եւ պարզելու դեպքում, որ Սերժ Սարգսյանն ունի ուղղակի մասնակցություն՝ քրեական հետապնդման ենթարկել նրան եւ բոլոր մեղավորներին՝ Վարդան Բոստանջյանը պատասխանեց. «Դուք կանխավ ինչո՞ւ եք անձնավորում, անուն տալիս»: Դիտարկմանը, որ դրանից շահեց Սերժ Սարգսյանը՝ Բոստանջյանը չհամաձայնեց. «Էդ ձեզ է թվում, դուք անուն եք հրապարակում, որը ճիշտ չի: Պարզ չի՞, որ Մարտի 1-ը մի գործ է, որը հնարավոր չի կանգնեցնել, շուտ թե ուշ դրան պետք է անդրադառնալ: Էսօր պախկվացրա, մյուսը, բայց դա մի օր բացահայտվելու է»:
Հարցին՝ Սերժ Սարգսյանի հրաժարականը պահանջո՞ւմ եք՝ «Հայկական վերածնունդ» կուսակցության անդամ Մհեր Շահգելդյանը պատասխանեց. «Որպեսզի հնարավոր լինի լուծել խնդիրները՝ արտագաղթը, մյուս խնդիրները, պետք է ունենալ ամբողջական իշխանություն: Մենք եղել ենք կոալիցիայի մեջ, բայց իշխանություն չենք ունեցել, ինչի արդյունքում դուրս ենք եկել: Ինչ-ինչ ծրագրեր հնարավոր եղավ իրականացնել: Ամբողջական խնդիրները լուծելու համար անհրաժեշտ են կտրուկ քայլեր, որոնք հիմա չենք տեսնում…Մեկ տարի հետո նախագահական ժամանակահատվածն ավարտվում է, այսօր գնում ենք խորհրդարանական ընտրությունների, ձեւավորվում է վարչապետական կառավարում: Մենք դեմ ենք եղել Սահմանադրական փոփոխություններին: Այս պայմաններում, երբ 1 տարի է մնացել, ԱԺ-ն ավարտում է իր գործունեությունը, գնում ենք ընտրությունների, պահանջել Սերժ Սարգսյանի հրաժարականը՝ անմիտ է»:
Մհեր Շահգելդյանն ասաց, որ իրենց առավելություններից է՝ Արթուր Բաղդասարյանի նման լիդեր ունենալը, նաեւ այն, որ իրենք ընտրությունից ընտրություն չեն աշխատում:
Մհեր Շահգելդյանը, անդրադառնալով ՀՎԿ-ի ծրագրի՝ ավանդների վերադարձման եւ պայմանագրային զինծառայողներով միայն առաջնագիծը համալրելու կետերին, որոնք խիստ քննադատվեցին ՀՅԴ-ի եւ նախագահ Սերժ Սարգսյանի կողմից, ասաց, որ այն ժամանակ էլ, երբ ավանդների մասին խոսում էին, էլի ասում էին՝ պոպուլիստական է, իսկ այսօր արդեն 40 մլն-ից ավելի փոխհատուցում են ստացել, ինչպե՞ս եղավ, ոչ ոք անիրատեսական խոստումներ չի տվել: Նա հիշեցրեց, որ առաջ էլ երբ ասում էին՝ 4-րդ , 5-րդ երեխա ունենալու դեպքում հնարավոր է նպաստ տալ, էլի ասում էին՝ անիրատեսական է, բայց եղավ: Ինչ վերաբերում է բանակի մասին առաջարկին, նա ասաց, որ խոսքը վերաբերում է ճակատային գծում 18 տարեկան երեխաներին փոխարինման մասին, սա հիմա տեղի է ունենում եւ հնարավոր է 20 տարվա ընթացքում առաջին գիծը համալրվի պրոֆեսիոնալներով:
Հռիփսիմե ՋԵԲԵՋՅԱՆ
