Վանո Սիրադեղյանը երկու օր առաջ հրավիրվել է ՀՀ դատախազություն՝ հարցաքննման, բայց ոչ թե Արմեն Տեր-Սահակյանի գործով, այլ Վահան Հարությունյանի տված ցուցմունքների հետ կապված։ «Հիմա, այս պահին, կատարվում է առերես հարցաքննություն»,- երեկ հրավիրած մամուլի ասուլիսում հայտարարեց ՆԳ եւ ԱԱ նախարար Սերժ Սարգսյանը։ Ասուլիսի մանրամասները՝ 2-րդ էջում։
ՍՏՈՒԳՈՂԱԿԱՆ ԳՈՐԾԸՆԹԱՑ
Ըստ «Առավոտ» հասած տեղեկությունների, ստուգումներ են սկսվել ՀՀՇ-ին եւ նրա վարչության նախագահին մոտ կանգնած մարդկանց հիմնարկություններում։ Ի մասնավորի, բայց դեռեւս չճշտված լուրերի համաձայն, ստուգումներ են անցկացվում միկրովիրաբույժ, ԱԺ պատգամավոր Արտավազդ Սահակյանի թիվ 1 կլինիկայում։ Նույն աղբյուրը նշում է նաեւ, որ ստուգումների գործընթացն սկսվել է ՀՀՇ վարչության անդամ Լեւիկ Խաչատրյանի գլխավորած «Հայհացահատիկ» ձեռնարկությունում եւս։
ՊԱՅԹՅՈՒՆ ԶԵՅԹՈՒՆԻ ՇՈՒԿԱՅՈՒՄ
Կարդացեք նաև
Զեյթունի շուկային մերձ բացօթյա տոնավաճառում երեկ առավոտյան տեղի է ունեցել պայթյուն։ Տաղավարների արանքում կապված թելի վրա ամրացված նռնակը պայթել է իր ապրանքը տոնավաճառ բերած կնոջ անզգույշ շարժումից։ Ժամանակ անց նման մի նռնակ է հայտնաբերվել նաեւ շուկայի մոտ գտնվող բացօթյա սրճարանում։ Երկրորդ նռնակը, բարեբախտաբար, չի պայթել… Առավել հավանական է այն ենթադրությունը, որ ահաբեկչությունն առնչվում է շուկաների սեփականաշնորհման գործընթացի համար սահուն ընթացք ապահովելուն։ Ուշ երեկոյան ճշտեցինք, որ պայթյունից վիրավորված կինը բժիշկների հսկողության տակ է:
