Երկուշաբթի օրը «Բարեփոխումներ» պատգամավորական խմբակցությունը կառավարությունից ստացել է 2 փաստաթուղթ։ Մեկը պարունակում է էներգետիկ հանձնաժողովի մշակած սակագնային քաղաքականության հետ կապված խնդիրները, մյուսը բնութագրում է էներգետիկայի ընդհանուր վիճակը։
Այնպես որ, երեկ ԱԺ-ում լրագրողների հետ հանդիպած խմբակցության անդամ Արմեն Մարտիրոսյանը 1999 թվականից էլեկտրաէներգիայի սակագնի բարձրացման մասին որեւէ լուրջ բան չէր կարող ասել։ «Այսօր կորուստները, էներգետիկայի նախարար Գագիկ Մարտիրոսյանն էլ է խոստովանել, շատ մեծ են։ Սա նշանակում է՝ արժեքի բարձրացում»։
Որքան պրն Մարտիրոսյանին է հայտնի, էներգետիկայի բնագավառն է ստանում ամենամեծ միջազգային վարկերը։ «Եվ այստեղ իրավունք ունենք պահանջելու, որ այս բնագավառում ռեֆորմները լինեն ամենաարդյունավետը»։ Իսկ սա նշանակում է սակագների հիմնավորված արժեք։ Այսօր նախագահ Քոչարյանն ընդունելու է «Բարեփոխումներ» պատգամավորական խմբակցությանը։
Լ. ԱՎԱԳՅԱՆ
