Մարտի 10-ին Լեռնային Ղարաբաղի եւ Ադրբեջանի միջեւ տեղի է ունեցել երկու ռազմագերիների եւ մեկ պատանդի փոխանակություն։ Ադրբեջանը Ղարաբաղյան կողմին է հանձնել 42-ամյա ռազմագերի Դավիթ Նազարյանին եւ 1938 թվի ծնված Բաբկեն Սահակյանին։ Իրենց հերթին ԼՂՀ իշխանությունները ազատ են արձակել ռազմագերի Ակիր Ահմեդովին։ Վերջինս, ԼՂՀ տարածքում դիվերսիոն գործողություններ ծավալելու համար, ղարաբաղյան դատական մարմիների կողմից ավելի վաղ դատապարտվել էր գնդակահարության։ Սակայն ԼՂՀ նախագահ Ա. Ղուկասյանը, նկատի ունենալով գերու անբավարար առողջական վիճակը, հրամանագիր էր ստորագրել նրան ներում շնորհելու մասին։ Փոխանակման արարողությունը տեղի է ունեցել Լեռնային Ղարաբաղի եւ Ադրբեջանի զինված ուժերի շփման գծի՝ Աղդամի հատվածում, Կարմիր խաչի միջազգային կոմիտեի միջնորդությամբ։
ՎԱՏ ԼՈՒՐ
«Ազգային վերածնունդ», «Հայկանդուխտ» ավանդապաշտ-ժողովրդավարական, «Հայ Դատ» կուսակցությունները բաժանվեցին Հայկոմկուսից՝ դրանով իսկ փլուզելով կոմունիստների կողմից ղեկավարվող ժողովրդահայրենասիրական միությունը։ Այդ երեք կազմակերպությունների հայտարարության մեջ ասված է. «Ցավով արձանագրում ենք, որ Սերգեյ Բադալյանը բացարձակապես մոռացավ միության գոյության մասին, ոչ մի գործնական աշխատանք չտարավ միության հզորացման ուղղությամբ։ Ավելին՝ նպաստեց միության քայքայմանը, պառակտմանը։ Սակայն դա չխանգարեց նրան՝ մերթընդմերթ օգտագործելու միության անունն իր անձի համար»։
