Նախագահին կից գործող սահմանադրական փոփոխություններ նախապատրաստող հանձնաժողովի աշխատանքը դադարեցվել է։ Հայտնի չէ, թե իրականության մեջ ինչ նկատառումներով է առաջնորդվել Ռոբերտ Քոչարյանը։ Նկատի՞ է առել Պարույր Հայրիկյանի զրոյական վարկը հասարակության մեջ եւ դրա հետեւանքները՝ վերջինիս ղեկավարած հանձնաժողովի առաջարկների նկատմամբ, թե մի այլ բան, սակայն տեղի ունենալիքն արդեն տեղի է ունեցել, ինչը մեկնաբանում է իրավաբանության դոկտոր Վլադիմիր Նազարյանը.
– Մի առիթով ասել եմ, որ այն առաջարկները, որ Պարույր Հայրիկյանի ղեկավարած հանձնաժողովն է ներկայացնելու, ես կանեի 1,5 ժամում։ Իհարկե, ոչ լուրջ վիճակում։ Լուրջ վիճակում ինձ նման բան թույլ չէի տա։ Իհարկե, ողջունում եմ, որ հանձնաժողովի աշխատանքները դադարեցվեցին։ Սահմանադրությունը բարդ փաստաթուղթ է եւ պահանջում է մասնագիտական մոտեցում։ Այդ փաստաթուղթը որքան իրավաբանորեն հղկված լինի, այնքան լավ։ Որովհետեւ տարբեր են քաղաքական շահերը, որոնք ներկայացնում են իբրեւ պետական շահեր։ Սահմանադրությունը խոր գիտելիքներ պահանջող բնագավառ է։ Փոփոխություններն այս ոլորտում հանրաքվեով չի կարելի լուծել, այլապես նույնն է, թե «Հրազդան» մարզադաշտում 75 հազար մարդ հավաքենք, ու քվեարկությամբ որոշենք՝ ինչ-որ մեկի սիրտը վիրահատե՞նք, թե ոչ, երբ երեք լուրջ սրտաբան իրենց կարծիքն արդեն հայտնել են։ Բայց դե, դեմոկրատիա է, չէ՝ բերեք քվեարկենք։ Իհարկե, Սահմանադրությունը կատարելագործման կարիք ունի՝ նախագահի լիազորություններին հակազդելու եւ տեղական ինքնակառավարման աշխատանքը կանոնավորելու առումով, սակայն, դա պետք է անել աստիճանաբար՝ փուլ առ փուլ։
Ա. ԶԱՔԱՐՅԱՆ
