Հայերենում գոյականները լինում են հատուկ եւ հասարակ։ Որ դատերը եւս լինում են հատուկ եւ հասարակ կամ հանցագործությունները լինում են հատուկ եւ հասարակ, մինչեւ վերջերս չգիտեի։ Օրինակ, կան հատուկ դատեր, որոնց մասին գրում են հատուկ լրագրողները։ Որոնց անցկացման մասին հոգում են հատուկ իրավապահները։ Որոնք տեղի են ունենում հատուկ դատարաններում՝ հատուկ տաքացվող, մաքուր, որտեղ մասնակցի անվտանգությունն ապահովելու համար ստուգում են հատուկ մետաղորսիչ սարքերով։
Հասարակ դատերն անցկացվում են գոմ հիշեցնող, ցուրտ դահլիճներում, որտեղ դռները ոտքով կարող են բացել ցանկացած պահի, ցանկացած մեկը՝ ով ուզի, որտեղ ոչ ոքի չեն ստուգում մետաղորսիչ սարքերով։ Երեկ մի քաղաքացիական գործի առիթով գտնվում էի Կենտրոն եւ Նորք-Մարաշ համայնքների առաջին ատյանի դատարանի շենքում։ Մեծ եղավ զարմանքս, երբ միջանցքում տեսա «Մակարովի» հետ խաղացող երիտասարդի։ Իհարկե, նա հետո դուրս եկավ շենքից (հարեւանությամբ՝ Կենտրոնի ՆԳ բաժինն է) եւ հեռացավ… Բայց տպավորվեց։ Այսպես կարող են մտնել հասարակ դատերին ու… որովհետեւ անվտանգության մասին ոչ ոք չի մտածում։ Որովհետեւ շարքային քաղաքացին հատուկ գոյական չէ։ Որովհետեւ շարքային քաղաքացու դատը հատուկ դատ չէ։ Ո՞վ կարող է երաշխավորել, որ վաղը որեւէ դատարանում կրակոց չի լինի։ Եվ եթե անվտանգության միջոցառումներն արվում են առանձին դատավարությունների համար, ժամանակը չէ՞, որ այն չանձնավորվի, որ հանցագործները կամ հանցագործությունները չտեսակավորվեն հատուկի եւ հասարակի։
Ռ. ՄԻՆԱՍՅԱՆ
ԹԱՂԱՊԵՏԱԿԱՆ ԿՐՔԵՐ. ՆԱԽԱԴԵՊ ՆՈՐ ՆՈՐՔՈՒՄ
Կարդացեք նաև
Նոր նորքեցիներն ընտրեցին իրենց թաղապետին։ Թեեւ ընտրացուցակներում առկա 90 հազար 541 ընտրողներից «ընտրական ակտիվություն» ցուցաբերեցին 27 հազար 483 մասիվցիներ։ Ձայները բաշխվեցին այսպես (ըստ մեր ունեցած նախնական տվյալների). Բախշյան Էդիկ- 6.818 (24,8 %), Մինասյան Մկրտիչ- 10.239 (37,3 %) եւ Պետրոսյան Դավիթ- 9.457 (34 %)։ Թաղապետի երկու այլ թեկնածուներ միասին հավաքել էին 3,5 % ձայն։ Երեկ Դ. Պետրոսյանի ընտրազանգվածը հանրահավաք կազմակերպեց թաղապետարանի շենքի դիմաց եւ հասկանալի է՝ խախտումների հետ կապված հարցով։ Սակայն, ինչպես հավատացնում են 40 հանձնաժողովների առանձին անդամներ, խախտումներ չեն եղել։ Խոսվում է որոշ տեղամասերում «հովհարային» անջատումների մասին…
ՖՐԱՆՍԻԱՅԻՑ ՎԵՐԱԴԱՐՁԱԾՆԵՐԸ
ԱԺ նախագահ Արմեն Խաչատրյանը Ֆրանսիա էր մեկնել առանց զրահապատ BMW-ի։ Լավ է, որ մեքենան հետը չէր տարել. պատկերացնո՞ւմ եք, թե նրբաճաշակ ֆրանսիացիք որքան կհիասթափվեին այսքան զգուշավոր խոսնակից։ Ֆրանսիա կատարած այցի կապակցությամբ Արմեն Խաչատրյանը մամուլի ասուլիս էր հրավիրել, որին չմասնակցեցի, քանի որ ներկայացել էի առանց փաստաթղթի։ Բայց գործընկերներիս ձայնագրություններից կարողացա պարզել, որ խորհրդարանական պատվիրակությունը հաջողությամբ է կատարել իր առաքելությունը։
ԱԶԱՏՈՒՄ
Երեւանի քաղաքապետարանի կրթության վարչության պետ Սիլվա Խրիմյանին ազատել են զբաղեցրած պաշտոնից։ Այդ պաշտոնին է նշանակվել Յուրի Բախշյանի կինը՝ Անահիտ Բախշյանը։
Սեփ. լր.
