Երկուշաբթի ՀՀԿ գրասենյակի դիմաց դարձյալ կարելի էր տեսնել հանրապետության մի շարք բարձրաստիճանների ավտոմեքենաները։ Ընդ որում, այնտեղ էր նաեւ զինվորական դատախազ Գագիկ Ջհանգիրյանի մեքենան։ Վստահ ենք, որ եթե նշեինք, թե ՀՀԿ-ում ներքաղաքական կացությունն է քննարկվել, հերքումներ կհետեւեին, թե իրենք Սահմանադրության բարեփոխումների շուրջ են խորհրդակցել։ Ուստի, միանգամից մեր ուրախությունն ենք արտահայտում այն առնչությամբ, որ Սահմանադրությունը փոփոխելու աշխատանքներին լծվել է նաեւ զինվորական դատախազը։ Ի դեպ, Գագիկ Ջհանգիրյանն իրոք նախագահին առընթեր սահմանադրական փոփոխություններ նախապատրաստող հանձնաժողովի անդամ էր Պարույր Հայրիկյանի օրոք։
ՎԱՏ ԼՈՒՐ
ԼՂՀ-ում եղած ժամանակ Ռոբերտ Քոչարյանը վիճաբանել է Զորի Բալայանի հետ։ Վերջինս առաջարկել էր հունվարի 20-ին նշել Բաքվում հայերի ջարդերի 10-րդ տարելիցը։ Ռոբերտ Քոչարյանը չի համաձայնել այն պատճառաբանությամբ, թե հունվարի 20-ը, երբ ռուսական զորքերը Բաքու մտան, Ադրբեջանի համար նույնն է, ինչ հայերի համար ապրիլի 24-ը։ Եվ այս բանավեճին է վերագրվում այն, որ Բաքվում հայերի ջարդերի տարելիցն, այնուամենայնիվ, դրանց սկսվելու օրը նշվեց՝ հունվարի 18-ին, այլ ոչ հունվարի 20-ին, որ դրանց, այսպես ասած, բարձրակետն էր։
