Օրերս խմբագրություն էր զանգահարել Սյունիքի մարզի մի բնակիչ, որը չցանկանալով ներկայանալ, մեզ տեղեկացրեց, որ «մի քանի օր առաջ Մեղրու դպրոցում օտար լեզվի օլիմպիադան էր։ Չորրորդ դասարանի աշակերտ Ռաֆայել Մարգարյանը մասնակցել է օլիմպիադային գերմաներեն լեզվից, որտեղ զբաղեցրել է երրորդ տեղը։ Սակայն դիպլոմները հանձնելու եւ ակտեր կազմելու ժամանակ պարզվել է, որ հանձնաժողովը փոխել է իր որոշումը եւ Ռաֆայելին շնորհել չորրորդ տեղը»։ Ծնողների այն հարցին, թե ինչու են առանց որեւէ բացատրություն տալու փոխել գրաված տեղը, Սյունիքի մարզպետարանի կրթության բաժնի վարիչ Գրիշա Մանուչարյանը պատասխանել է. «Գոհ եղեք, որ ընդհանրապես նրան որեւէ տեղ է հատկացվել։ Բոլոր տեղերը նախօրոք վաճառված էին, ուղղակի երեխայի խաթրից դուրս չգալու համար տվեցինք չորրորդ տեղը»։
Մեր այն հարցին, թե անհայտ զրուցակիցս արդյոք ունի՞ փաստարկներ, որ տեղերը «նախօրոք վաճառված են» եղել, նա ասաց. «Դե, Մեղրին միշտ էլ Ղափանի գաղութն է եղել։ Իսկ քանի որ օլիմպիադայի հիմնական կազմակերպիչներն ու օգնողները ղափանցիներն էին, բնական է, նրանք էլ պետք է տնօրինեին օլիմպիադայի ողջ ընթացքը»։
Հարցի պարզաբանման համար դիմեցինք Սյունիքի մարզպետարանի կրթության բաժնի վարիչ Գրիշա Մանուչարյանին, որն էլ պատասխանեց, որ «մարզային օլիմպիադայում հաղթել է 8 երեխա։ 1-3-րդ տեղերին տրվել են դիպլոմներ, իսկ մնացածներին՝ որպես խրախուսական մրցանակ՝ նվերներ։ Ձեզ հասած տեղեկությունն առնվազն չարախոսների կողմից հորինված հերյուրանք է»։
Ա. Դ.
