Ինչպես տեղեկացրել ենք, ՀՀ նորանշանակ ոստիկանապետ Վովա Գասպարյանը խառնաշփոթ է ստեղծել Շիրակի մարզի ոստիկանությունում. մի քանի օր առաջ պաշտոններ էր բաժանել, որոշել էր Ախուրյանի ոստիկանապետ Վահրամ Ենգոյանին տեղափոխել Գյումրի, Ամասիայի ոստիկանապետ Աշոտ Գրիգորյանին` Ախուրյան, Ղուկասյանինը` Ամասիա և այլն, սակայն ուրբաթ օրը մտափոխվել էր ու նրանց հրամանները չէր ստորագրել: Երբ Ախուրյանի ոստիկանապետ Վահրամ Ենգոյանը մեկնել էր Երևան` իր հրամանը ստանալու, պարզվել էր, որ նա պետք է զբաղեցնի ոչ թե Գյումրու ոստիկանապետի պաշտոնը, այլ պիտի դառնա Շիրակի մարզի օպերատիվ գծով փոխոստիկանապետ: Այս փաստը անակնկալի էր բերել այդ պաշտոնը զբաղեցնող Գևորգ Թադևոսյանին, ով նեղսրտել էր` իր հերթին չհամաձայնելով ստանձնել Ախուրյանի ոստիկանապետի պաշտոնը, որը, բնականաբար, ավելի ցածր է, քան իրենը:
Մեր աղբյուրների տեղեկացնելով, Գևորգ Թադևոսյանը փորձել էր բանակցել Վովա Գասպարյանի հետ, սակայն վերջինս անդրդվել է եղել, այնպես որ այսօր Գևորգ Թադևոսյանը ստանձնեց իրեն հրամցվող աշխատանքը: Նրան կեսօրին ներկայացրին որպես Ախուրյանի ոստիկանապետ, Վահրամ Ենգոյանն էլ պաշտոնապես նշանակվեց մարզի փոխոստիկանապետ: Ոստիկանական մեր աղբյուրների փոխանցելով, այս նշանակումները ոչ անքան գցել է Գևորգ Թադևոսյանի տրամադրությունը, որքան Ախուրյանի ոստիկանապետ Վահրամ Ենգոյանինը: Մեր աղբյուրների ասելով, եթե նրան տային Գյումրու ոստիկանապետ, դա մեծ առաջխաղացում կլիներ, քանի որ Գյումրու ոստիկնապետը վարչության պետին հավասար պաշտոն է, իսկ մարզի օպերատիվ գծով փոխոստիկանապետի աշխատանքը ոչ միայն եկամտաբեր չէ, այլ պասիվ է ու անշուք, պիտի բավարարվի մի քանի գողություններ բացահայտելով: Գյումրու ոստիկանապետի պաշտոնը դեռևս թափուր է, նույնիսկ անուններ դեռ չեն շրջանառվում, թեև կան կասկածներ, որ այդ պաշտոնի համար կադր կընտրեն Երևանից: Ի դեպ , գյումրեցի մի քանի բարձաստիճան պաշտոնյաների հավաստմամբ, այսպես ասած նորանշանակները ժամանակից շուտ էին ուրախացել, օրինակ` Ախուրյանի ոստիկանապետ Վահրամ Ենգոյանը, Գյումրու ոստիկանապետ դառնալու մտքից, այնպես է ոգևորվել, որ ռեստորաններից մեկում մեծ խնջույք է կազմակերպել, աչքալույս ու շնորհավորանքներ է ընդունել, սակայն գնացել է մայրաքաղաք ու անակնկալի եկել: Ի դեպ, ոստիկանապետերի տեղափոխությունը հասավ նաև Վանաձոր. այսօր Վանաձորի ոստիկանապետ, սպիտակցի Սերգո Ավետիսյանին նշանակեցին Ապարանի ոստիկանապետ:
Նշենք, որ նա այդ պաշտոնը զբաղեցնում էր մոտ 4 տարի, նախկինում եղել է Սպիտակի ոստիկանապետը, ինչպես բնութագրում են մեր աղբյուրները, նա ավելի շատ շինարար է, քան ոստիկանապետ. կառուցել է թե Սպիտակի և թե Վանաձորի ոստիկանության շենքերը:
Նունե ԱՐԵՎՇԱՏՅԱՆ
