Մամուլի հրապարակումների համաձայն, ՀՀ ոստիկանապետ Վլադիմիր Գասպարյանն իբր ոստիկանների հետ հանդիպումներից մեկի ժամանակ ասել է. «Վովան հըլը քնած ա, որ արթնացավ՝ ինքն էլ է իրենից վախենալու»:
«ՉԻ»- Իսկ մեզ թվում էր, թե արթնանալուց հետո իրենք իրենցից վախենում են միայն 60-ն անց կանայք՝ հայելու մեջ նայելով: Բանից պարզվում է՝ ոստիկանապետներն էլ են վախենում: Բայց խնդիրն, իհարկե, դա չէ: Խնդիրն այն է, որ Վլադիմիր Գասպարյանը փաստորեն քնած վիճակում է ոստիկանության վերնախավի կեսին գործից հանել կամ տեղափոխել այլ աշխատանքի: Ու հիմա երեւի առայժմ իրենց տեղերում մնացածները պիտի շտապ ինչ-որ «հանձնախումբ» ստեղծեն, որի հիմնական գործառույթը պիտի լինի պրն Գասպարյանին օրորելն ու օրորոցային երգելը, որպեսզի հանկարծ չզարթնի: Լավագույն տարբերակն, իհարկե, կլիներ «Cпи моя радость, усни» երգը, բայց այն, ցավոք, հայեցի չէ, հետեւաբար կառաջարկենք «Մութն ընկել է, ուշ է արդեն, աչուկներն են մեր փակվում» հոգեպարար երգը: Կարծում ենք՝ արդյունքում ե՛ւ ոստիկանական համակարգը կշահեր, ե՛ւ հասարակությունը:
«Չորրորդ ինքնիշխանություն»
