Ըստ Բարսեղ Բեգլարյանի, եթե ներկայումս բենզինը 500 դրամ է, կուտակված պաշարների շնորհիվ է: «Ֆլեշի» նախագահը մեզ հետ զրույցում ակնարկեց, որ այսօր արտասահմանում ձեռք բերված բենզինը Հայաստան հասնելուց հետո «Ռեգուլյարի» մեկ լիտրի գինը կարող է հասնել 520-530 դրամի։
Բենզինի գնի բարձրացումը մի «հմայք» էլ ունի։ Խոսքը նրա մասին է, որ չնայած պաշտոնապես բենզին են ներկրում մի քանի ընկերություններ, այդուհանդերձ՝ բոլորի գները բարձրանում են գրեթե միաժամանակ։ «Ֆլեշ»
ընկերության նախագահի համար սա հանելուկ է։ «Մյուսներին ես ասում եմ՝ ա՛յ մարդ, ես թանկացրել եմ բենզինը, դուք մի թանկացրեք, թող իմ բենզինը մնա՝ ձերը վաճառվի, բայց բարձրացնում են»,- ասում է Բեգլարյանը՝ դա բացատրելով այն հանգամանքով, որ մեր շուկան շատ փոքր է, եւ բենզինի մանրածախ առեւտրով զբաղվողները, մեկը մյուսին նայելով, միանգամից բարձրացնում են գները։ Այս «հանելուկով» գբաղվում է նաեւ ՀՀ տնտեսական մրցակցության պաշտպանության հանձնաժողովը։ Զբաղվում է արդեն մոտ երկու ամիս ու ոչ մի կերպ չի կարողանում լուծել։ Հանձնաժողովից երեկ մեզ հայտնեցին, որ բենզինի շուկայում ուսումնասիրություններ են սկսվել դեռ այս տարվա փետրվարին, երբ մեկ օրում բենզինը 20 դրամով թանկացավ բոլոր լցակայաններում։ Այս ընթացքում հանձնաժողովը փաստաթղթեր ու տեղեկանքներ է պահանջել բենզինի շուկայի մասնակիցներից, ուսումնասիրել արտաքին աշխարհում բենզինի մեծածախ գների դինամիկան, սակայն լրացուցիչ փաստաթղթեր պահանջելու կարիք է առաջացել։ Բայց, կարծես, ուսումնասիրությունները ավարտին են մոտենում, եւ հանձնաժողովից խոստանում են առաջիկայում հրապարակել իրենց ուսումնասիրությունների արդյունքները։
Հ.Գ. Մեզ հետ զրույցում Բարսեղ Բեգլարյանը ասում էր, թե իր տեղեկություններով՝ մայրաքաղաքում կան լցակայաններ, որտեղ բենզինը դեռ չի թանկացել։ Մեր շրջայցը, սակայն, հակառակը վկայեց. առավոտյան սկսված թանկացումը ժամը 16-ի դրությամբ արդեն ավարտվել էր, եւ քաղաքի տարբեր մասերում գտնվող մեզ հանդիպած բոլոր լցակայաններում բենզինի գինը բարձրացել էր:
Կարդացեք նաև
Հայկ ԳԵՎՈՐԳՅԱՆ
«Հայկական ժամանակ»
