Այսօր ՍԴՀԿ եւ ՀԱԿ անդամ Գուրգեն Եղիազարյանը Aravot.am-ի հետ զրույցում խոստովանեց, որ ՀՅԴ-ԲՀԿ-ՀԱԿ միասնական շտաբը չի աշխատել: Մեր հարցին` ժամանակին Նիկոլ Փաշինյանը հանդես էր գալիս «վերջ դոդացմանը» կարգախոսով, հիմա նրա կարծիքը ինչի՞ փոխվեց` պարոն Եղիազարյանը պատասխանեց. «Մի պարզ բան ասեմ, ՀՀԿ-ն միշտ դրանից օգտվում է, որ մենք մենակ ենք հանդես գալիս: Այս անգամ շտաբ ստեղծվեց, ինչից ահաբեկվեցին: Տեսնո՞ւմ եք ոնց են հիմա ԲՀԿ-ի հետ խոսում` շատ հեզ ու խելոք: Ես չեմ իմանում` վաղը հեզ, խելոք կլինե՞ն, թե՞ չէ, բայց այսօր շատ հեզ են խոսում: Այդ շտաբն էր, որ ստեղծվեց: Այսօր կարողանում են շատ հեզ ու հանգիստ խոսեն Դաշնակցության հետ` այդ շտաբն էր, որ ստեղծվեց: Բայց, ցավոք սրտի, շտաբն այնպիսի բռունցք չդարձավ, որպեսզի այդ տոտալ կեղծիքների դիմացն առներ: Շտաբն, իմ կարծիքով չաշխատեց»: Մեր հարցին` ի՞նչ եք կարծում, ԲՀԿ-ն այս ընտրություններին ընտրակաշառք բաժանե՞լ է, թե՞ ոչ` պարոն Եղիազարյանը մտածեց-մտածեց ու պատասխանեց. «Թույլ տվեք չմեկնաբանել»:
Գուրգեն Եղիազարյանը վստահ է, որ «Բարգավաճ Հայաստանը» կրկին կոալիցիա կկազմի ՀՀԿ-ի հետ. «Իհարկե կկազմի` միանշանակ: Բայց Վարդան Օսկանյանը կմնա իր խոսքի տերը` դուրս կգա Բարգավաճից»:
Հռիփսիմե ՋԵԲԵՋՅԱՆ
