Նանսենի այգու հարակից շենքերի բնակիչներն այսօր Քաղաքապետարանի շենքի առջեւ բողոքի ակցիա են կազմակերպել: Բնակիչները դժգոհում են, որ առանց հանրային լսումներ անցկացնելու ու շինարարության օրինական հիմքերը ներկայացնելու՝ քաղաքապետարանը կառուցապատման թույլտվություն է տվել:
Բնակիչների տեղեկություններով՝ այգում Նանսենի անվան թանգարան են կառուցում: « Մենք ոչ թե անգրագետ ենք ու չենք, ճանաչում, չենք սիրում Նանսենին ոչ թե դեմ ենք թանգարանին, այլ դեմ ենք իրենց անօրինական գործելաոճին ու վտանգներ ենք տեսնում՝ ունենալով նախադեպերը, որ վաղը մյուս օրը արդյոք սա չի վերածվի ինչ-որ մասնավոր մեկի սրճարանի: Քաղաքապետարանը մեզ ստույգ չի ասում, որ տարածքը իրենն է լինելու, նույնիսկ եթե այդ նպատակով , շատ շատերը մեր թաղամասում վրդովված են . ուրիշ տարածք կարող էին ընտրել, ինչո՞ւ են կանաչ տարածքը վերցնում»,- դժգոհեց այգու հարակից շենքի բնակիչ Սամվել Սվազյանը:
Մի ուրիշ բնակիչ էլ հավելեց, որ քաղաքում ոչ մի ապօրինություն չի կարելի օրինականացնել.«Ի վերջո այս քաղաքը պետք է վերադարձվի հանրությանը, քանի որ վաղը խնդիր ենք ունենալու, մեր զավակները չեն գնալու բանակում ծառայելու, որովհետեւ ասելու են այս երկիրը մի քանի հոգու սեփականությունն է»:
Կարդացեք նաև
Բնակիչների պահանջը լսեց քաղաքապետարանի աշխատակազմի քարտուղարի տեղակալ Արթուր Կարապետյանը: Նա քաղաքացիների գրավոր դիմումը վերցրեց ու ասաց, որ պատասխանը մեկ ամսվա ընթացքում կտրվի:
Արփինե ՍԻՄՈՆՅԱՆ
