Ինչպես ավելի վաղ հաղորդել էինք, երեկ Աղավնաձորի ճամբարում տեղի ունեցավ ՀՀ սփյուքի նախարարության «Արի տուն 2012» ծրագրի 4-րդ փուլի փակումը, որին ներկա էր նախարար Հրանուշ Հակոբյանը:
4-րդ փուլով Հայաստան են ժամանել 180 մասնակից ԱՄՆ-ից, Գերմանիայից, Բուլղարիայից, Արգենտինայից, Կիպրոսից, Վրաստանից, Հոլանդիայից, ՌԴ մարզերից եւ Ուկրանինայից: Անցած 14 օրերի ընթացքում նրանք եղել են Օշականում, Եռաբլուրում, Ծիծեռնակաբերդում, Մայր Աթոռ Սուրբ Էջմիածնում, Մատենադարանում եւ ալյուր: 10 օր հյուրընկալ ընտանիքներում անցկացնելուց հետո պատանիներն ու աղջիկները եկել են Աղավնաձոր, որտեղ ճամբարային 4 օրերի ընթացքում մասնակցել են մարզական խաղ-մրցույթների, քննարկումների եւ արշավների:
Միջոցառումը մեկնարկեց հայրենասիրական բանաստեղծությունների ասմունքով. մասնակիցները հանդես եկան պարային եւ երաժշտական համարներով, այնուհետեւ իջեցվեց «Արի տուն 2012» ծրագրի դրոշը:
Կարդացեք նաև
Aravot.am-ի հետ զրույցում Թբիլիսիից ժամանած Գեորգի Ղազարյանը նշեց, որ այս օրերի ընթացքում ամրապնդվել է իր հայրենասիրթյունը. «Հյուրընկալվել եմ Եղվարդի ընտանիքներից մեկում: Ծրագրի շնորհիվ շատ ընկերներ ձեռք բերեցի, այցելեցի տարբեր պատմամշակութային վայրեր: Հատկապես տպավորիչ էր Խոր Վիրապի փոսում գտնվելը եվ զգալը, թե որտեղ է ճգնել Գրիգոր Լուսավորիչը»: Պատանին հավելեց, որ Հայաստան պարբերաբար այցելում է կարատեի մրցությունների շրջանակում:
Լրագրողների հետ զրույցում Սփյուքռի նախարար Հրանուշ Հակոբյանը փաստեց, որ «Արի տնից» առավել հայապահպան ծրագիր չկա. «Դրա շնորհիվ հայ երիտասարդները կապվում են հայրենի հողի եւ ջրի հետ` հեռանալուց սիրտն ու հոգին թողնելով այստեղ: Որտեղ էլ մեծանան` նրանք հայ են մնալու: Հետագայում կաշխատենք ծրագիրն ընդլայնելու ուղղությամբ»:
Կիպրոսի «Նարեկ» վարժարանի հայոց լեզվի ուսուցչուհի Մագի Հալաջյանը ելույթի խոսքում նշեց, որ կիպրոսահայ մասնակիցները կարոտած սրտով են ժամանել Հայաստան` հայրենի սրբություններին հաղորդակցվելու եւ հայերենը որպես մշակութային գանձ որդեգրելու նպատակով. «Փափագում եմ, որ հայերը վերադառնան օտար երկրների նախանձը քրքրող հայրենիք եւ շենացնեն այն: Օտար հողի վրա կառուցած տունը մերը չէ: Հայաստանն է բոլորիս հայրենիքը, որը մագնիսի պես գերում է մեր սիրտն ու հոգին»:
Տոնական համերգի ավարտին արիտունցիները խարույկ վառեցին` արցունքներն աչքերին գրկելով իրար:
Լուիզա ՍՈՒՔԻԱՍՅԱՆ
