Երկու օր առաջ ՀՀ վարչապետ Տիգրան Սարգսյանը ԵԱՀԿ-ում հավատարմագրված դեսպանների հետ քննարկեց ՀՀ-ում իրականացվող բարեփոխումները, ԵՄ-ի հետ համագործակցության ընթացքը և տարածաշրջանային այլ հարցեր: Իր ելույթում նա անդրադարձ կատարեց նաև բիզնեսը քաղաքականությունից տարանջատելու հայտնի թեզին: Վարչապետը մասնավորապես նշեց. «Մեր խնդիրն է տարանջատել բիզնեսը քաղաքականությունից, թափանցիկ դարձնել պետական գործիչների գործունեությունը, հասարակությանը հասանելի դարձնել վերջիններիս եկամուտների վերաբերյալ հայտարարագրերը: Այդպիսի արմատական փոփոխություններ տարբեր իրավական նորմերի ընդունմամբ և այլ գործողություններով մենք արդեն իսկ կատարել ենք, և կարծում եմ, դրանք մեր բարեփոխումների նոր սկիզբն են»:
Վարչապետի հնչեցրած բարեփոխումների ցանկության և բարի նպատակների մասին մեկնաբանություններ խնդրեցինք ՀԱԿ անդամ, ՀՀ նախկին վարչապետ Հրանտ Բագրատյանից: Aravot.am-ի հետ զրույցում նա նշեց. «1991 թվից դա ասում ենք, ՀԱԿ-ի ծրագրում էլ է գրված: Վարչապետն ինչքան ասում է տարանջատենք բիզնեսը քաղաքականությունից, այնքան ավելի միացնում են: Եվ ընդհանրապես, վարչապետի ասածն ու նրա անձը ինձ չեն հետաքրքրում: Ի՞նչ նոր սկիզբ…. ամոթ է, 2012 թվականին վեր է կենում մի բան է ասում, որ երեսուն տարի մենք ասում ենք: Իրեն էլ թվում է՝ մարդիկ իրեն հավատում են»:
Տաթև ՀԱՐՈՒԹՅՈՒՆՅԱՆ
