«Ոստիկանները հետեւում են ինձ: Կխնդրեի ոստիկանապետին, որ ինձ մի պաշտպանեք, իմ կարգուկանոնը մի պաշտպանեք: Մենք մեր հանրահավաքների ցանկը կտանք, մի վախեցեք, մենք ինքներս ի վիճակի ենք մեր կարգուկանոնը պաշտպանելու»,- այսօր «Ազատություն» կուսակցության նախագահ Հրանտ Բագրատյանն արմավիրցիների հետ հանդիպման ժամանակ այսպիսի հորդորով դիմեց Վլադիմիր Գասպարյանին:
Նա հիշեցրեց, թե Սերժ Սարգսյանն ինչ է խոստացել 5 տարի առաջ ու չի արել. «Կուզեի, որ վաղը իրա հետ հանդիպմանը դուք գայիք, ոչ թե չինովնիկները ու ասեիք՝ այ ընկեր, բան ես խոստացել՝ պիտի անես»:
Ներկայացնելով իր նախընտրական ծրագրերը՝ Հրանտ Բագրատյանը նշեց, որ նոր սկսվող բիզնեսի համար մինչեւ 5000 դոլարի վարկի տոկոսը պետությունն է մարելու: «Պիտի վերացնենք էս բանկերի մոնոպոլիան: Մարտի 2-ին դրամն արժեզրկվեց, ոչ մեկի փողը, քաղաքների ավանդները չկոմպենսացրեցին, ամբողջ ռիսկը մնաց ժողովրդի վրա: Ես սա վերացնելու եմ, էս խաղերը պիտի վերանա: Սերժ Սարգսյանն ու Տիգրան Սարգսյանը, իրանք չեն ուզում սա վերացնեն, իրանք ուզում են իրենց տասը տղաները լինեն, կառավարեն բանկերը»:
Դիմելով արմավիրցիներին, նա կոչ արեց, որ չմոտենան իրեն ու չասեն, որ ոստիկանները հսկում են, վախենում են գալ հանդիպման:
Կարդացեք նաև
«Մեռնում-գնում ենք, էդ ավանդները խի՞ չեն վերադարձնում»,- հետաքրքրվեց արմավիրցիներից մեկը:
Հրանտ Բագրատյանը տեղեկացրեց, որ ապլիկացիաներով կձեւակերպեն ու կմարեն, թե ինչքան տարում՝ չի կարող ասել. «Մի 10-12 տարում կմարենք, մանանա չեմ խոստանում»:
Մի մարդ հարցրեց՝ երբ ընտրվեք նախագահ, ի՞նչ եք անելու առաջին քայլը, արտագաղթը…բան: Նա պատասխանեց, որ այնպես չի, որ ինքը մի անգամ գոռա՝ արտագաղթի հարցը կլուծվի. «Առաջին օրը փոխելու ենք մաքսային ծառայության պետին»:
Հրանտ Բագրատյանը նաեւ ասաց, որ «ի տարբերություն Սերժի, ես չեմ ասում, թե ապահով Հայաստան կստեղծեմ: Այդ ապահով Հայաստանը դուք կստեղծեք, հասկանո՞ւմ եք: Իմ մոտեցումն ավելի գրագետ է: Ռոբերտը եկավ, ասեց՝ բացում եմ աշխատատեղ, Սերժը նրա աշխատատեղերը փակեց, հիմա իրենն է բացում»:
Հռիփսիմե ՋԵԲԵՋՅԱՆ
