Այսօր Շիրակի մարզի ընդհանուր իրավասության դատարանում շարունակվեց Վարդան Ղուկասյանի դստեր փեսացուի սպանության գործով դատավարությունը:
Մասնակիցների մուտքը դատարանի դահլիճ բավականին բարդացրել էին, բնականաբար, ելնելով անվտանգության նկատառումներից: Կարգադրիչները, շրջափակելով դահլիճի դուռը, հատ-հատ ստուգում էին պայուսակները, հագուստները, գրպանները, նոր միայն թույլատրում ներս մտնել: Պատճառը, ամենայն հավանականությամբ, այն էր, որ նախորդ դատական նիստը անցավ շիկացած մթնոլորտում, անեծքներով, վիրավորանքներով , և դատավոր Մարտին Սարոյանին բավականին դժվար էր զսպել թե տուժողի, և թե մեղադրվողի հարազատներին:
Այսօրվա դատական նիստի ժամանակ նման միջադեպեր չարձանագրվեցին: Հիշեցնենք, որ անցած տարվա ապրիլի 12-ին` Գյումրու նախկին քաղաքապետի ավագ դստեր` Մանյայի ու Կարեն Եսայանի նշանադրության օրը, դաժանաբար սպանել էին փեսացուին: Այժմ այս գործով մեղադրվում է Անի նախկին ոստիկանապետի որդին`1983 թվականին ծնված Հարություն Սարգսյանը: Նրան մեղադրանք է առաջադրվել Քրեական օրենսգրքի երկու հոդվածներով` 104 հոդվածի 1-ին մասով՝ սպանություն կատարելը և 188 հոդվածի 1-ին մասով` ապօրինի ձեռնարկատիրական գործունեություն իրականացնելը:
Հարություն Սարգսյանի փաստաբան Լուսինե Սահակյանը միջնորդություն ներկայացրեց դատարանին` պահանջելով անհապաղ ազատ արձակել իր պաշտպանյալին, փոխել նրա խափանման միջոցը: Փաստաբանը պնդում էր, որ Հարությունին ապօրինաբար են անազատության մեջ պահում, և որ դատարանը, խափանման միջոցը ընտրելիս, որևէ փաստական հանգամանք հաշվի չի առել: Ավելին, լրացել է ամբաստանյալին կալանքի տակ պահելու ժամկետը, սակայն նա ազատ չի արձակվել:
Կարդացեք նաև
Փաստաբանը մեջբերեց նախադեպեր Եվրադատարանի վճիռներից, համաձայն որի, նման դեպքում ամբաստանյալը պետք է ազատ արձակվեր: Գլխավոր դատախազության ավագ դատախազ Արմեն Մարուխյանը, բնակաբար, առարկեց այդ միջնորդությանը` նշելով, որ վերջինս մեղադրվում է Քրեական օրենսգրքի 104 հոդվածի 1-ին մասով, հետևաբար և բարձր է գնահատվում այն հնարավորությունը, որ նա , գտնվելով ազատության մեջ, կխուսափի պատասխանատվությունից և կխոչընդոտի նախաքննության ընթացքը: Փաստաբան Լուսինե Սահակյանը նկատեց, որ Եվորպական դատարանի նախահիմքերը ցույց են տալիս, որ հանցանքի ծանրությամբ չի կարելի պայմանավորել հիմքը: Դատարանը առանձնացավ խորհրդակցական սենյակ ` որոշում կայացնելու: Այն տևեց ուղիղ 2 ժամ: Նշենք, որ մինչ այդ կես ժամով անընդմեջ ընդմիջվում էր դատական նիստը: Այն թեև նշանակված էր ժամը 12.00-ին , սակայն դատավորից բացի ոչ մեկը ճիշտ ժամին չէր ներկայացել նիստին:
Մարտին Սարոյանը ստիպված եղավ սպասել փաստաբաններին ու երկու կողմերի հարազատները : Դատը սկսվեց 12.30-ից `տևելով մինչև 17.00-ն: Դատարանը մերժեց փաստաբան Լուսինե Սահակյանի` Հարություն Սարգսյանին անհապաղ ազատ արձակելու միջնորդությունը` գտնելով, որ նա կարող է թաքնվել և խոչընդոտել նախաքննության ընթացքը: Ամբաստանյալի շահերը պաշտպանելու համար երկու փաստաբաններին միացավ նաև երրրոդը` Հունան Բաբայանը, ով դատարանին խնդրեց 10 օր ժամանակ տալ գործի նյութերին ծանոթանալու համար: Դատը հետաձգվեց մինչև փետրվարի 27-ը:
Նունե ԱՐԵՎՇԱՏՅԱՆ
