Այսօր առավոտյան 06:30-ի սահմաններում գլխի հատվածին տարբեր վնասվածքներով եւ անգիտակից վիճակում Կապանի բժշկական կենտրոնի վնասվածքաբանական բաժանմունք է տեղափոխվել Կապանի բնակիչ, 1970թ.-ի ծնված Արմեն Վարդանյանը: Բաժանմունքի վարիչ Սարիկ Աթաջանյանի փոխանցմամբ` հիվանդի մոտ փափուկ հյուսվածքների սալջարդ է եղել, իսկ հիվանդի մոտ այդ պահին առկա էր ալկոհոլային հարբածություն: Դեպքի հետ կապված մանրամասն տեղեկությունների այստեղ չէին տիրապետում: «Ճիշտն ասած բժշկին չի հետաքրքրում դեպքի մանրամասները, հիվանդանոց բերելիս ասել են, որ աստիճաններին դեմքի վրա վայր է ընկել, մեզ միայն հետաքրքրում է հիվանդի վիճակը: Ներկա պահին գիտակցությունը վերականգնվել է, բայց շարունակում է մեր ուշադրության կենտրոնում մնալ, քանի որ դեմքի սալջարդը գլխի վրա է», – ասաց բաժանմունքի վարիչ Սարիկ Աթաջանյանը:
Մեր ունեցած տեղեկություններով` բնակիչը հիվանդանոց է տեղափոխվել ծեծկռտուքի արդյունքում, սակայն մանրամասներ ճշտել չհաջողվեց: Որոշ տեղեկությունների համաձայն՝ նրան ծեծի է ենթարկել Սյունիքի մարզպետ Սուրեն Խաչատրյանի թիկնապահ Զարզանդ Նիկողոսյանը:
Սակայն դեպքի վերաբերյալ ոստիկանության Կապանի բաժանմունքից որեւէ տեղեկություն ստանալ չհաջողվեց, այնտեղից միայն փոխանցեցին, որ տեղեկության համար դիմենք լրատվական վարչություն, սակայն այստեղ էլ մեր հեռախոսազանգերին չպատասխանեցին:
Սյունիքի մարզպետ Սուրիկ Խաչատրյանը թիկնապահ չունի և չի ունեցել, իսկ նման դեպք կապել Ս.Խաչատրյանի անվան հետ՝ տեղին չէ: