Այսօր Aravot.am-ը ՀՀՇ նախկին անդամ Արարատ Զուրաբյանից հետաքրքրվեց՝ Գագիկ Ծառուկյանի հայտարարությունից հետո, որ ԲՀԿ-ն ընդդիմություն չէ եւ չի կարող դառնալ, պե՞տք է արդյոք Լեւոն Տեր-Պետրոսյանն ընդունի, որ սխալվել է եւ ներողություն խնդրի ԲՀԿ-ի նկատմամբ սխալ հաշվարկի համար: Նա պատասխանեց. «Ես չեմ ուզում, եկեք այդ հարցը Լեւոն Տեր-Պետրոսյանին ուղղեք, բայց մի բան արձանագրվել է. այն, ինչ որ մենք շատ երկար ժամանակ ասում էինք: Այն, ինչ Գագիկ Ծառուկյանը հայտարարել է, որ ԲՀԿ-ն ընդդիմություն չի եւ չի կարող լինել, մենք սրա մասին խոսել ենք, բնականաբար լրիվ այլ տեսակետներ ենք լսել ՀԱԿ-ից, սակայն կարծում եմ, ժամանակը շատ այլ հարցերում էլ ամեն ինչ իր տեղն է դնում»:
Մեր հարցին՝ Ձեր այս քայլը՝ նոր ՀՀՇ կուսակցություն ստեղծելու, ավելի չի՞ մասնատի ընդդիմադիր դաշտը՝ նա պատասխանեց, որ ընդհակառակը. «Ես կարծում եմ, որ շատ ավելի միավորող դեր կխաղա: Կարծում եմ, դրանում շատ շուտով կհամոզվենք»:
Մեր դիտարկմանը, որ շատերի մոտ ՀՀՇ-ն վատ համբավ ունի, ասոցացվում է մութ ու ցուրտ տարիների հետ՝ Արարատ Զուրաբյանը պատասխանեց. «Ցանկացած պարագայում, եթե մարդիկ նույնիսկ անունն են փոխում կամ ինչ-որ մի բան, չեն կարող խուսափել իրենց անցյալից: Թե՛ դրականը, թե՛ բացասականը մեր կյանքում մերն է: Մեր սեփականությունն է: Իհարկե, պետք է ցավալ նրա համար, որ եղել են երեւույթներ, որոնք բացասական են, պետք է նաեւ գիտակցել, որ ցանկացած մարդ անսխալական չի, նաեւ քաղաքական ուժ: Եղել են ձեռքբերումներ, որոնցով, կարծում եմ, յուրաքանչյուրը կարող է հպարտանալ: Այդպես շարունակելու ենք»:
Մեր հարցին՝ կա՞ մի սխալ, որ այսօր Դուք կարող եք կանգնել եւ խոստովանել, որ սխալվել եք՝ Արարատ Զուրաբյանը պատասխանեց. «Մենք բազմաթիվ սխալներ մեր ընդունել ենք կյանքում: Կարծում եմ, առաջիկա մեր գործունեության ընթացքում առաջին իսկ համագումարին մենք կխոսենք դրա մասին»:
Կարդացեք նաև
Հռիփսիմե ՋԵԲԵՋՅԱՆ
