Էրեբունի եւ Նուբարաշեն վարչական շրջանի ընդհանուր իրավասության դատարանը դատավոր Վլադիմիր Գրիգորյանի նախագահությամբ այսօր արտագնա հերթական նիստ է հրավիրել արդարադատության նախարարության «Նուբարաշեն» քրեակատարողական հիմնարկում:
Դեռ շարունակվում է նույն հիմնարկի կալանավորներ, ցմահ ազատազրկման դատապարտվածներ Արտակ Ճաղարյանի, Արարատ Մուրադխանյանի եւ Հովսեփ Սահակյանի դեմ հարուցված քրեական գործով դատաքննությունը: Ցմահ ազատազրկման դատապարտված Արարատ Մուրադխանյանի պաշտպանը, ՀՀ փաստաբանների պալատի անդամ Լիպարիտ Սիմոնյանը այսօր մեկ այլ քրեական գործով (Վազգեն Խաչիկյանի եւ մյուսների գործով) դատական նիստի էր, եւ մեզ տեղեկացրեց, որ այդ իսկ պատճառով նիստը հետաձգվել է:
Հիշեցնենք, որ ցմահ ազատազրկվածները ըստ մեղադրանքի կողմի, իրենց խցում վերանորոգում կատարելու պատրվակով, վարչակազմից օրինական կարգով ստացել էին մուրճ, պտուտակահան, «զուբիլ», փորձել էին բացել խցի սանհանգույցի առաստաղը: Այնտեղից նրանք մտադիր էին դուրս գալ ՔԿ հիմնարկի զբոսասրահ:
Սակայն անցյալ տարվա ապրիլին խցում իրականացված խուզարկության ժամանակ խորշը հայտնաբերվել էր:
Կարդացեք նաև
Ցմահ դատապարտյալ Արարատ Մուրադխանյանը մինչ օրս պնդում է, որ այդ խորշում իր քրեական գործի նյութերն էր պահում:
Պաշտպանական կողմը մի քանի անգամ բողոքարկել է անհավասար մրցակցային դատավարության դեմ, գտնելով, որ ամբաստանյալները դատական նիստերի ժամանակ չպետք է գտնվեն ոչ միայն ճաղավանդակում, այլ չպետք է լինեն ձեռնաշղթաներով:
Նշենք, որ անդրանիկ դատական նիստը հրավիրվել էր անցյալ տարվա հոկտեմբերի 26-ին:
Հաջորդ դատական նիստը նշանակվել է մայիսի 22-ին:
Ռուզան ՄԻՆԱՍՅԱՆ
