Հայ փոքրիկ բլոգերի մասին մեր նախորդ հրապարակումներից մեկում արդեն անդրադարձել ենք: Պարզվում է՝ բլոգավարությամբ շատ դպրոցականներ են հետաքրքրված: 14-ամյա Ասյա Թադևոսյանը, ով սովորում է «Մխիթար Սեբաստացի» կրթահամալիրում արդեն մեկ տարի է, ինչ զբաղվում է բլոգով: Սովորում է դպրոցում, 7 տարի է՝ պարով է հետաքրքրված, հաճախում է «Նուռ» պարային համույթ, սակայն ինչպես ինքն է ասում, բլոգով զբաղվելը իր համար ուրիշ աշխարհ է:
«Առաջին անգամ, երբ լսեցի բլոգ բառը, իմ մեջ մե՜ծ հետաքրքրություն արթնացավ, մեր դպրոցի աշակերտները պարտադիր պետք է բլոգ ունենան,- ասում է Ասյան,-դա մտնում է դպրոցի ծրագրի մեջ: Առաջին անգամ, երբ լսեցի, որ պետք է բլոգ բացեմ թերահավատորեն էի մոտենում այն ստեղծելուն, սակայն մի փոքր ժամանակ անց այն դարձավ իմ հոբբին, և հիմա մեծ հաճույքով եմ զբաղվում դրանով: Բակային խաղերին չմասնակցելը չգիտեմ՝ լա՞վ է, թե՝ վատ, բայց հիմա այս համակարգչային դարում, հենց փոքր տարիքից շատ կարևոր է դրան տիրապետելը . . .»
Ասյան ասում է՝ դրսում խաղալու ժամանակ չի ունենում: «Դուրս եմ իջնում միայն երկու նպատակով` խանութ կամ տատիկիս տուն գնալու համար : 🙂 Վերջին խաղացածս խաղը երկու տարի առաջ էր, եթե չեմ սխալվում, փոքրերով класс էինք խաղում»,- ասում է նա:
Ասյան իր գրառումներից մեկում անդրադարձել էր մարդկանց և փոքրերի իրավունքին. պարզվում է՝ նա հենց այնպես ոչինչ չի գրում:Ուզում է իրավաբան դառնալ 🙂
«Just be free սա իմ բլոգին կարգախոսն է: Շատ եմ գնահատում ազատությունը: Բոլորովին վերջերս հասկացա, որ ես պետք է դառնամ իրավաբան, որպեսզի պաշտպանեմ մարդկանց շահերը և իրավունքները, այդ թվում նաև երեխաներինը, որոնք ցավոք այդքան էլ պաշտպանված չեն մեր երկրում: Դեռ շատ անելիքներ ունենք»,- ասում է Ասյան:
Փոքրիկ բլոգերներով երբեմն անհամաձայնություններ են ունենում 🙂
Արտուշ Միքայելյանը, ով Ասյայի հասակակիցն է, նույնպես զբաղվում է բլոգավարությամբ: Ինչպես նա պատմեց` իր բլոգը բացելու հարցում օգնել են ընկերները: Երբ խոսեցինք անհամաձայնությունների մասին թե’ Ասյան և թե’ Արտուշը ասացին.
«Երբ մենք ընկերներով հավաքվում ենք, ապա անպայման քննարկում ենք մեր բլոգները, ով ի՞նչ նոր բան է իմացել, ով ի՞նչ խնդիրներ ունի: Անհամաձայնություններ իհարկե լինում են, բայց վերջում մենք միշտ էլ գալիս ենք ընդհանուր հայտարարի»
Բլոգ ասելով՝ Ասյան միանգամից պատկերացնում է տնակ, որտեղ ապրում ու մեծանում են իր մտքերը. «Իսկ ահա բլոգիս ընթերցողները տնակիս հարևաններն են, չնայած տնակի դռները բոլորի առաջ են միշտ բաց»,- ասում է նա:
Արտուշն էլ ասում է. «Բլոգս իմ մորոլակն է, այնտեղ ես եմ և իմ ստեղծագործությունները: Ամեն մի բլոգերի համար, կարծում եմ, դա այդպես է: Յուրաքանչյուր բլոգեր իր մոլորակի պատասխանատուն է»:
Օվսաննա Սիմոնյան
Կարդացեք նաև
