Օգոստոսի 23-ին Մալաթիա Սեբաստիա վարչական շրջանում՝ Զորավար Անդրանիկի հրապարակում «Կանանց իրավունքների կենտրոն» հասարակական կազմակերպությունը կազմակերպել էր ակցիա՝ «Ամոթի պատ»:
Ակցիայի ընթացքում կենտրոնի աշխատակիցները անցորդներին բաժանում էին թռուցիկներ, որոնք բացատրում էին՝ որն է համարվում բռնություն: Նաեւ քաջալերում էին իրենց կարծիքը գրել ու ամրացնել «ամոթի պատի» վրա: Պատը իրենից ներկայացնում էր բռնության տեսարան պատկերող վահանակ:
Կենտրոնի կորդինատոր Սաթենիկ Գևորգյանի խոսքերով՝ ակցիայի գլխավոր նպատակն է տեղեկացնել մարդկանց իրենց կենտրոնի աշխատանքի մասին և անցորդներին խրախուսել իրենց ուղերձը, ցանկություններն ու պատկերացումները ընտանեկան բռնության վերաբերյալ տեղադրել պատի վրա` վերհանելով ընտանեկան բռնության խնդիրը՝ ցույց տալ մարդկանց վերաբերմունքը հարցի շուրջ.
«Կանանց իրավունքների կենտրոնը բազմաթիվ բացօթյա ակցիաներ է կազմակերպել քաղաքի կենտրոնում, որոշեցինք այս անգամ էլ ծայրամասի բնակչությունը ինտեգրված լինի այս միջոցառմանը: Ընտրել ենք ամենամեծ ու մարդաշատ թաղամասերից մեկը»:
Կարդացեք նաև
Ակցիայի մասնակիցներից մեկը ողջունեց գաղափարը.
«Բռնությունը տարածված ա, դրա համար էլ սենց բաներ են անում: Էդ բռնության պատճառով քանի ընտանիք է այքայվել: Բայց մենակ մեծերը չեն տուժում՝ մի քանի դեռահաս ինքնասպան եղան էդ պատճառով: Չնայած դրան, ակցիան ունի թերություններ՝ մատչելի չեն բացատրում մարդկանց ու թղթերը լավ չեն կպնում՝ անընդհատ պոկվում են»:
Ամի ՉԻՉԱԿՅԱՆ
