«Փաստինֆո»-ն շարունակում է Քրեական դատավարության օրենսգրքի նախագծում տեղ գտած նորամուծությունների քննարկումները` ներկայացնելով տարբեր կողմերի փաստարկներն ու հակափաստարկները: Սակայն, այս բանավեճին որոշակի առումով, կարծես թե, անհաղորդ է մնացել օրենսդիր մարմինը, որը, ըստ էության, կոչված է նախագիծը ընդունելու կամ մերժելու:
Տևական ժամանակ ԱԺ-ում շրջանառության մեջ գտնվող Քրեական դատավարության նոր օրենսգրքի դեռևս լիագումար նիստերի օրակարգ չընդգրկվելու պատճառների, նախագծի վիճահարույց դրույթների վերաբերյալ «Փաստինֆո»-ի թղթակիցը զրուցեց Ազգային ժողովի Պետական-իրավական հարցերի մշտական հանձնաժողովի անդամ, «Հայ ազգային կոնգրես» խմբակցության անդամ, ՀՀ նախկին զինվորական դատախազ, իրավաբանական գիտությունների թեկնածու Գագիկ Ջհանգիրյանի հետ:
– 2012թ. սեպտեմբերի 14-ից Ազգային ժողովում շրջանառության մեջ է դրվել կառավարության հեղինակած Քրեական դատավարության նոր օրենսգրքի նախագիծը, իսկ 2013թ.-ի նոյեմբերի 29-ից՝ նախագծի լրամշակված տարբերակը: Բոլորը կարևորում են Քրեական դատավարության նոր օրենսգրքի ընդունումը, սակայն այն այդպես էլ չի ստացել գլխադասային՝ Պետական-իրավական հարցերի մշտական հանձնաժողովի դրական եզրակացությունը և, հետևաբար Աժ օրակարգում չի ընդգրկվել: Ինչո՞վ է դա պայմանավորված:
-Ճիշտն ասած՝ ես չեմ կարծում, որ ընդունումը հետաձգվում է: Ուղղակի քանի որ Քրեական դատավարության օրենսգիրքը բարդագույն օրենսգրքերից մեկն է և մեծածավալ է, դրա քննարկումը չի կարող լինել սովորական օրենքի նման: Մենք հեղինակների հետ արդեն հանձնաժողովի մոտ 15 նիստեր ենք կազմակերպել: Քննարկում ենք օրենսգիրքն ըստ բաժինների, ինստիտուտների, անդրադառնալով յուրաքանչյուր հոդվածի ու նորմի: Հուսամ՝ ևս մի 10-15 այդպիսի նիստ, և հեղինակների հետ մեր նախնական քննարկումը կհամարենք ավարտված:
Կարդացեք նաև
Բայց չպետք է մոռանալ, որ օրենսգիրքը վերաբերում է իրավակիրառ շատ մարմինների, գերատեսչությունների, և մենք պետք է լսենք նաև նրանց կարծիքները՝ այս կամ այն ինստիտուտի, նորմի վերաբերյալ: Ճիշտ է՝ նրանց հետ երկար քննարկումներ չենք կազմակերպելու, որովհետև օրենսգիրքը նախնական լուրջ լրամշակում է անցել, բայց որոշակի քննարկումներ, այնուամենայնիվ, կլինեն:
Այնպես որ, ես կարծում եմ, որ օրենսգիրքը նորմալ քննարկման մեջ է: Իհարկե, լավ կլիներ, որ մենք օր առաջ այն ընդունեինք և կիրառման մեջ դնեինք: Բայց, կարծում եմ, սա այն դեպքն է, որ շատ շտապելն օգուտ չի կարող բերել: Օրենսգիրքը գործելու է առնվազն 10-15 տարի և չի կարելի թերի մշակված օրենսգիրք դնել գործողության մեջ:
Պետք է շեշտեմ, որ հեղինակային խմբի կողմից շատ մեծ աշխատանք է կատարված և լավ աշխատանք է կատարված, մեծ ծավալի, տեսական բավարար մակարդակի նախագիծ է պատրաստված, և նկատված թերություններն ու բացթողումները չեն նսեմացնում կատարված աշխատանքի արժեքը:
Քանի որ սա մասնագիտական օրենսգիրք է, և Ազգային ժողովի ոչ բոլոր իրավաբան պատգամավորներն են մասնագիտացված քրեական դատավարության մեջ, կարծես, ավելի մեծ պատասխանատվություն ենք կրում առանց հակասությունների, առանց լուրջ թերությունների նախագիծ մատուցել ԱԺ-ին: ԱԺ-ի լիագումար նիստում նախագծի ներկայացման և ընդունման փուլում նման մանրակրկիտ աշխատանք օրենսգրքի վրա հնարավոր չէ կատարել:
Մանրամասները կարող եք կարդալ` pastinfo.am-ի կայքում