«Մտավախություն ունեի, որ ՍԴ-ի որոշումից հետո Սերժ Սարգսյանը կառավարության հրաժարականը կնախաձեռնի՝ գործընթացի նախաձեռնությունը իր ձեռքը վերցնելու համար»,-Aravot.am-ի հարցին՝ արդյոք ՀՀ վարչապետ Տիգրան Սարգսյանի հրաժարականը սպասելի՞ էր, այսպես պատասխանեց «Ժառանգություն» կուսակցության փոխնախագահ Արմեն Մարտիրոսյանը: Նա նկատեց, որ այս քայլը կապված էր նաև ոչ իշխանական ուժերի քառյակի գործունեությամբ: Սակայն այն, որ հենց այս պահին վարչապետը հրաժարական կտա, այնքան էլ սպասելի չէր Արմեն Մարտիրոսյանի համար: Նա այս առիթով ասաց. «Որպես պրոցես դա կանխատեսելի էր, բայց որ այս պահին կլինի՝ ոչ, քանի որ վարչապետը շատ վստահ էր խոսում կառավարության նիստին և չէր երևում, որ դա մեկ ամիս առաջ հրաժարականի դիմում ներկայացրած վարչապետ է»:
Ըստ Արմեն Մարտիրոսյանի կառավարության հրաժարականով մեր երկրում ոչինչ չի փոխի: Նա հավելեց. «Մենք շարունակում ենք մնալ այն համոզման, որ երկրին արմատական իշխանափոխություն է պետք: Իրավիճակը հանգեցրել է նրան, որ անհապաղ քառյակի ղեկավարների հանդիպում է անհրաժեշտ, որ հետագա քայլերը ճշտվեն»: Մեր դիտարկմանը, թե կառավարության անվստահությունը պահանջող ընդդիմության քայլերը որո՞նք են լինելու, ո՞րն է լինելու օրակարգը: Նա պատասխանեց. «Ինչպես նախկինում նշում էինք, որ հանգրվանային իշխանափոխության ենք գնում, ապա հիմա այդ իրավիճակն ունենք, կառավարությունը հրաժարական է տվել, ուստի, որ նախաձեռնությունը ամբողջությամբ չմնա Սերժ Սարգսյանի ձեռքին, պետք է, որ այդ փոփոխությունների ուղղությամբ քայլերը շարունակվեն: Դրա համար առանց քառյակի առաջնորդների հանդիպման հնարավոր չէ առաջ շարժվել: Երկրում միայն խաղի կանոններ փոխելով է հնարավոր այնպիսի իրավիճակ ստեղծել, որ մեր հասարակությունը օգտվի դրանից, այլ ոչ թե ամբողջ պետական հարստությունը, բյուջեն, ազգային հարստությունը ծառայեցնեն մի խումբ մարդկանց գերշահույթներ ապահովելուն»:
Քառյակի հետագա քայլերի մասին պարոն Մարտիրոսյանն ասաց. «Հանգրվանային իշխանափոխության առաջին փուլը եղել է, հիմա շարունակում ենք ամբողջական իշխանափոխության ճանապարհով: Ժառանգությունը կողմնակից է նրան, որ երկրին անհրաժեշտ է ամբողջական իշխանափոխություն, արտահերթ ընտրություններ և արմատական բարեփոխումներ»:
Հավանական թեկնածուների մասին հարցին պարոն Մարտիրոսյանն այսպես արձագանքեց. «Եթե նույն այս համակարգն է մնալու, նույն այս մեծամասնությամբ, ապա էական չէ, թե ով է լինելու վարչապետը»:
Կարդացեք նաև
Տաթև ՀԱՐՈՒԹՅՈՒՆՅԱՆ