Այսօր Վանաձորում կազմակերպված հանրային նախահավաքի ժամանակ Արմեն Մարտիրոսյանն անդրադարձավ նաեւ պարտադիր կուտակային կենսաթոշակային համակարգի ներդրման հարցին ` նկատելով, որ դրանով ընդամենը փորձ է արվում բյուջե գումար բերել:
«Կուտակային այս հիմնադրամով, որ փորձում են ստեղծել, ընդամենը մի խնդիր է ուզում կառավարությունը լուծել ` բյուջեն գումար բերել: Փորձում են միջազգային կառույցներից գումար ստանալ, սա է խնդիրը: Հո մեր ապահով ծերության մասին չեն մտածում: Նույնիսկ մեր նորմալ ներկայի մասին չեն մտածում, ուր մնաց թե ծերության մասին մտածեն»,-ասաց Արմեն Մարտիրոսյանը:
Նա նկատեց, որ այդ իսկ պատճառով էլ «Ժառանգություն» կուսակցության ` ամբողջական իշխանափոխություն կատարելու տարիներ առաջվա տեսակետը անփոփոխ է:
«Սա է պատճառը, որ «Ժառանգության» տեսակետը, որը հայտնվել է տարիներ առաջ, մնում է ուժի մեջ ` ամբողջական իշխանափոխություն, արմատական բարեփոխումներ, կառավարման նոր խաղի կանոններ: Պետության հարստությունը, պետական բյուջեն պետք է ծառայի մեզ բոլորիս, եւ ոչ թե մի քանիսի: Ուստի երկրին անհրաժեշտ է ամբողջական իշխանափոխություն, երկրին պետք է լեգիտիմ նախագահ, լեգիտիմ Ազգային ժողով, երկրին պետք է կառավարություն, որի անդամները ոչ թե Հայաստանի ամենահաջողակ գործարարներն են, այլ երկրին պետք են կառավարության անդամներ, որոնք բացառապես աշխատավարձ են ստանում եւ իրենց պարտականություններն են կատարում, եւ ոչ թե ընտրությունների համար փորձում են ինչքան կեղծիք կա, կատարեն: Միեւնույն է, իրենք դրանից ոչինչ չեն շահում. քաղաքացին արտագաղթեց, բյուջեում գումար չի լինելու»,-եզրափակեց «Ժառանգության» փոխնախագահը:
Կարդացեք նաև
Անուշ ԲՈՒԼՂԱԴԱՐՅԱՆ
