Սահմանադրական դատարանի խորհրդական Գեւորգ Դանիելյանը համաձայն չէ, այն դիտարկման հետ, որ թեկուզ այն, որ սահմանադրական բարեփոխումների շուրջ քննարկումներում թե քաղաքական ուժերն են պասիվ, թե հասարակությունը (քննարկումները հիմնականում կիսադատարկ դահլիճներում են ընթանում ), չի՞ հուշում, որ մարդիկ իրենց կյանքի որակի փոփոխությունը չեն պայմանավորում երկրի գլխավոր փաստաթղթով: Քննարկումներում պասիվությունը նա բացատրում է իրազեկվածության ցածր մակարդակով ու տեղեկացնում, որ հենց այդ պատճառով էլ քննարկումների ժամկետը երկարացվել է: «Իրազեկման անհրաժեշտություն կա եւ այս քննարկումները, հատկապես մարզերում, հենց դրան են միտված»,- ասաց նա:
Դիտարկմանը, որ քաղաքական գործիչները իրենց պասիվությունն այդ քննարկումներում բացատրում են նրանով, որ սահմանադրական բարեփոխումների քաղաքական պահանջարկ չեն տեսնում, մեր զրուցակիցն արձագանքեց. «Ես չեմ ուզում քաղաքական գնահատականներին անդրադառնալ: Ես մասնագետ եմ եւ համարում եմ կոռեկտ՝ քաղաքական գնահատականներին զուտ քաղաքական չափանիշներով պատասխաններ տալը: Եթե հանրային քննարկումների ընթացքում մենք հանդիպենք այնպիսի իրավիճակի, առայժմ ես դա չեմ տեսնում, որ ակնհայտ լինի՝ այս փաստաթղթի նկատմամբ բավարար չափով հետաքրքրվածություն չկա, բնական է, ինքներս կնախաձեռնենք հակառակը: Առայժմ, ես տեսնում եմ, որ իրազեկվածություն չկա»:
Նելլի ԳՐԻԳՈՐՅԱՆ
