«Դուրս մեր գրպանից» նախաձեռնության կազմակերպած ավտոերթը այսօր սկսվեց Մյասնիկյան պողոտայից՝ կենդանաբանական այգու դիմացից ու անցավ երթի մասնակիցների նախատեսած երթուղիով:
Այս անգամ դեռ երթը չսկսված ոստիկանները ու երթի մասնակիցները պայմանավորվեցին, որ մեկը մյուսին չի խանգարելու: Վարորդները խոստացան չխախտել երթեւեկության կանոնները, իսկ ոստիկաններն էլ խոստացան՝ չխոչընդոտել ակցիան: Երթը անցավ Աբովյան փողոցով, Մաշտոցի պողոտայով ու ավարտվեց Բրազիլիայի հրապարակում:
Կարդացեք նաև
«Խնդրում եմ ուղղակի բացի Հանրապետության հրապարակից, որտեղով ուզում եք միասին իջնենք»երթի մասնակիցներին դիմեց ՃՈ ներկայացուցիչ Արսեն Արշակյանը:
Վարորդներն էլ վստահեցրին, որ իրենք հանրապետության հրապարակում չեն կանգնի, այլ կշրջանցեն կանցնեն:
«Տղամարդը տղամարդու պե՞ս»,- հարցրեց պարոն Արշակյանը եւ ստացավ վարորդների դրական պատասխանն ու սկսվեց ավտոերթը:
Նախաձեռնության անդամ Վարդան Հակոբյանն էլ անդրադարձավ կառավարության նախաձեռնած փոփոխություններին երթեւեկության կանոնների խախտման համար տուգանքների չափերի վերաբերյալ ու ասաց.«Կան կետեր, որոնք տրամաբանության մեջ են, բայց դրանցով չեն ավարտվում մեր խնդիրները: Խոսք դեռ չկա սեկցիաների, գծանշումների մասին: Եթե ցանկություն կա ընդհանուր եզրեր գտնել վարորդների հետ, ապա պետք է գնալ կոնկրետ խնդիրների լուծման, կոնկրետ պահանջում ենք տուգանքների համաներում:
Այս համակարգն իր անկատարությամբ եւ սխալ ներդրմամբ բերել է բազմաթիվ խնդիրների: Մարդիկ միլիոններով կուտակված պարտքեր ունեն, նրանց կեսը արտագաղթում է, մյուս մասը վարկեր է վերցնում: Եթե ցանկանում են սոցիալական բեռը թեթեւացնել, տուգանքների մասով գոնե համաներում հայտարարեն, այդ մարդիկ հանցագործություն չեն արել, վնասներ չեն տվել պետությանը: Համաներում հայտարարել ու սկսել զրոյական մակարդակից»:
Արփինե ՍԻՄՈՆՅԱՆ
