Հայաստանի ավտոմոբիլային ֆեդերացիայի ու «Ադրենալին» էքստրեմալ սպորտաձեւերի ֆեդերացիայի նախաձեռնությամբ և ջանքերով սեպտեմբերի 21 ին Իջևանում տեղի է ունեցել Jeep Trophy Sprint տիպի միջազգային սիրողական բաց մրցարշավ` Motul Low Range 2014 խորագրով:
Ինչպես այսօր լրագրողների հետ հանդիպմանը նշեց «Ադրենալին» ֆեդերացիայի նախագահ Արտաշես Ստեփանյանը, միջոցառմանը մասնակցել են շուրջ 100 պրոֆեսիոնալ և սիրողական մասնակիցներ Հայաստանից, Վրաստանից, Ռուսաստանից, Իրանից ու Թուրքիայից:
Հայաստանի ներկայացուցիչները զբաղեցրել են ողջ պոդիումը ITB դասում, A դասում հայկական անձնակազմը 2-րն է եղել, B դասում, ցավոք, մրցանակային տեղ մեր ավտոմարզիկները չեն զբաղեցրել, C` բացարձակ դասում Հայաստանի ներկայացուցիչները զբաղեցրել են 2-րդ ու 3-րդ հորիզոնականները, իսկ 1-ինն այդ դասում եղել է Ռուսաստանը ներկայացնող՝ ազգությամբ հայեր՝ Վլադիմիր Պապոյան/Վյաչեսլավ Զեյթունյան անձնակազմը:
Ինչպես նշեց ՀԱՖ-ի նախագահ Գագիկ Աղաջանյանը՝ մրցատեղին պատահական չէր ընտրված: «Իջևանն ընտրել ենք՝ առաջնորդվելով աշխարհագրական դիրքով: Օֆֆ-ռոուդ մեքենաների համար հետաքրքիր վայր է` այստեղ կան թե՛ գետ, թե՛ գրունտային ու ճահճոտ ճանապարհահատվածներ: Մի խոսքով, նման մրցման համար հարմար բնական բարդություններ կան: Մենք այս մրցաշարը երկրորդ տարին է՝ ինչ անցկացնում ենք: Նախորդ անգամ՝ 2013-ին նոյեմբերի 17-ին կայացավ մրցարշավն ու մասնակցում էին 4 երկրների ներկայացուցիչներ: Այժմ մենք ակնկալում ենք, որ այն կդառնա ավանդական, ու մասնակիցների թիվը կրկին կավելանա»,-եզրափակեց Գագիկ Աղաջանյանը:
Կարդացեք նաև
Գայանե Նազարյան
