Այսօր` հոկտեմբերի 9-ին, Եվրասիա համագործակցության հիմնադրամում տեղի ունեցավ «Ինչին է ծառայում լրագրությունը» խորագրով ձեռնարկի շնորհանդեսը: Շնորհանդեսին ներկա էր նաեւ Հայաստանում Մեծ Բրիտանիայի արտակարգ եւ լիազոր դեսպան Քեթի Լիչը:
Եվրասիա համագործակցության հիմնադրամի Հայ-ադրբեջանական ծրագրի ղեկավար, գրքի խմբագիր Իզաբելլա Սարգսյանը նշեց, որ գիրքը երկարատեւ աշխատանքի արդյունք է, աշխատանքները սկսվել են 2008 թվականից, երբ մի շարք կազմակերպությունների հետ համատեղ հիմնադրամը սկսել է լրագրողների համար նախատեսված դասընթացների շարք`ինչպե՞ս լուսաբանել կոնֆլիկտային իրավիճակները.
«Այդ ամենը, ինչ մենք մի քանի անգամ արեցինք, մտածեցինք, թե ափսոս է, որ այն կորի, եւ այդ բոլոր նյութերը 50-60 լրագրողներ օգտագործեն եւ դրանք վերանան: Գաղափար ծագեց, որ այդ ամենը հավաքենք եւ ստեղծենք մի ուղեցույց, ձեռնարկ, որ այլ լրագրողներ կարողանան սա վերցնել եւ օգտվել»:
Կարդացեք նաև
Գրքի ստեղծման աշխատանքներին մասնակցել են նաեւ ադրբեջանական կազմակերպությունները: Գրքի ռուսերեն տարբերակը շուտով հասանելի կլինի համացանցում:
Դեսպան Քեթի Լիչը իր ելույթում ասաց, որ վերջին տաս տարիների ընթացքում Մեծ Բրիտանիայի դեսպանատունը փորձում է աջակցել Լեռնային Ղարաբաղի հակամարտությանը լուծում տալուն ուղղված ծրագրերին.
«1998 թվականին համաձայնագիրը, որ կնքվեց Հյուսիսային Իռլանդիայում իրականում կարող էր 20 տարի առաջ կնքվել եւ մեծ առումով նույն բանը կլիներ,: 25 տարի տեւեց, որ քաղաքական գործիչները եւ բնակչությունը հասկանան, որ սա է ճանապարհը: Ես հուսով եմ, որ ավելորդ 25 տարի էլ չի պահանջվի, որ Լեռնային Ղարաբաղի հակամարտությունը լուծում ստանա»:
«Եվրասիա համագործակցություն» հիմնադրամի տնօրեն Գեւորգ Տեր-Գաբրիելյանի խոսքերով` գիրքը կամ ժամանակին է լույս տեսել, որպեսզի լրագրողները կարողանան օգտվել, կամ էլ այն ժամանակավրեպ է.
«Սա առաջարկում է, որ մարդս մարդ լինի, լրագրողը լրագրող լինի, որ չդառնա զինվոր, չդառնա խաբեբա: Այն վիճակում, որ ստեղծվել էր բեւեռացում էր տեղի ունենում եւ բոլորի մոտ ազգայնական վերելքի հերթական ալիքն էր, դժվար էր սպասել, որ այլ բան կլինի: Բայց երբ նայում էի, Հայաստանում կարծես, թե առանց այս դասագրքի էլ մի փոքր իրավիճակը փոխվել է»:
Ամի ՉԻՉԱԿՅԱՆ
