Հարցազրույց պաշտպանության նախկին նախարար ՎԱՂԱՐՇԱԿ ՀԱՐՈՒԹՅՈՒՆՅԱՆԻ հետ
-Պարոն Հարությունյան, դուք ուսումնասիրել եք ԼՂՀ ՌՕՈՒ-ին պատկանող ՄԻ-24 ուղղաթիռի խոցման տեսանյութը, որը, ի դեպ, շրջանառեց ադրբեջանական կողմը։ Որպես զինվորական՝ ո՞րն է ձեր գնահատականը, ի՞նչ է կատարվել, իրավացիորե՞ն է հնչում այն մեղադրանքը, թե հայկական ուղղաթիռները շատ էին մոտեցել հակառակորդի դիրքերին:
-Նախ արձանագրենք, որ ադրբեջանական կողմը նոյեմբերի 12-ին խոցելով Արցախի պաշտպանական բանակի ուղղաթիռը՝ իրականացրեց զինադադարի պայմանագրի կոպտագույն խախտում: Կատարվել է անթույլատրելի հանցագործություն: Անկախ այն բանից` ուղղաթիռը մոտ է եղել շփման գծին, թե հեռու, կարեւորն այն է, որ տվյալ ուղղաթիռը գտնվել է հայկական տարածքում, այն չի հարձակվել եւ զինված չի եղել: Այնպես որ արցախյան կողմին որեւէ մեղադրանք հնարավոր չէ ներկայացնել: Դա նույնիսկ ծիծաղելի է:
Հիմա դառնամ տեսաերիզին։ Դրա ուսումնասիրությամբ հստակ արձանագրում ենք հետեւյալը. հակաօդային պաշտպանության (ՀՕՊ) միջոցի՝ «Իգլա» հրթիռի արագությունը 570 մ/վ է, իսկ կրակոցից մինչեւ ուղղաթիռը խոցելը անցնում է 3,4 վայրկյան։ Դա նշանակում է` ուղղաթիռը շփման գծից եղել է առնվազն 1 կմ հեռավորության վրա: Իրականությանը չի համապատասխանում այն, թե ուղղաթիռը մոտեցել էր հակառակորդի դիրքերին, սա անընդունելի է:
Կարդացեք նաև
Կրկնում եմ, հայկական ուղղաթիռը չի մտել Ադրբեջանի տարածք, այն շփման գծից հեռու է եղել 1 կմ, այսինքն՝ եղել է Արցախի տարածքում, ուղղաթիռը չի ունեցել մարտական զենք:
-Ինչո՞վ կբացատրեք Բաքվի տարբեր գերատեսչությունների հակասական հայտարարությունները:
-Առաջին հայտարարությամբ նրանք ասացին` հայկական ուղղաթիռը փորձել է հարձակում գործել ադրբեջանական դիրքերի վրա, եւ իրենք ստիպված են եղել այն ոչնչացնել: Հետո Ադրբեջանի ՊՆ-ն հայտարարեց, թե հայկական ուղղաթիռը խախտել է օդային սահմանը, բայց գիտակցելով, որ նման հայտարարությամբ փաստացի ճանաչում են ԼՂՀ սահմանը, Բաքվի պաշտոնյաները փոխեցին նաեւ այս ձեւակերպումը, ասելով` հայկական ուղղաթիռը գտնվել է «ադրբեջանական օկուպացված տարածքներում», դրա համար են խփել:
Թե ինչո՞ւ է Ադրբեջանը նման հակասական հայտարարություններ անում, պատճառը մեկն է. որպես հանցագործություն կատարած կողմ փորձում է թաքցնել իր մեղքը` տարբեր կեղծիքներ շրջանառելով:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
