Այսօր Գյումրու ավագանու տարեվերջյան նիստի ժամանակ քննարկվեց ու հաստատվեց քաղաքի գլխավոր փաստաթղթի նախագիծը: Ինչպես զեկուցեց քաղաքապետարանի ֆինանսական բաժնի պետ Լենա Ջիլավյանն, այս տարին ավարտում են «շատ հավասարակշռված, հիմնավորված բյուջեով ու բարձր ցուցանիշներով»: Գյումրու քաղաքապետ Սամվել Բալասանյանը 2015 թվականի բյուջեն համարեց սոցիալ-մշակութային: Այն կազմում է 3 միլիարդ 234 միլիոն 729 հազար 900 դրամ:
Պետական բյուջեից հատկացվող դոտացիան այս տարի կազմում է 1 միլիարդ 166 միլիոն 962, 7 հազար դրամ և 149 միլիոն 641,2 հազար, որը մտնում է այլ դոտացիաների մեջ: Ի նկատի ունենալով, որ դոտացիան հատկացվում է նաև ըստ համայնքի բնակչության թվաքանակի, Գյումրու ավագանու անդամ Լևոն Բարսեղյանը քաղաքի գլխավոր ֆինանսիստից՝ Լենա Ջիլավյանից հետաքրքրվեց, թե բնակչության ի՞նչ թիվ է ընկած դոտացիայի հաշվարկի հիմքում: «Էս տարի դոտացիան հաշվարկելիս բնակչության թիվը չենք ներկայացրել ընդհանրապես, ընդհանրապես չեն ներկայացնում, ֆինանսների նախարարությունը վիճվարչություններից հավաքագրել է տվյալները բոլոր համայնքների, ինչպես նաև Գյումրի համայնքի: Դոտացիա հաշվարկելու ժամանակ հիմնականում վերցվում է բնակչության թիվ, հողահարկ, գույքահարկ, գույքի հարկն ու հողի հարկը բնականաբար մենք են տվել, իսկ բնակչության թիվը համայնքը չէր կարող տալ, որովհետև մարդահամար մենք արել և չունենք էդ տվյալները: Հարցրել են վիճվարչությունից, հաշվարկել են դոտացիան, պատրաստի թիվը ներկայացրել են մեզ: Ձեր հարցի պատասխանը, որ մենք բնակչության թվաքանակը չգիտենք»,- ասաց Լենա Ջիլավյանը:
Նշենք, որ Գյումրու ավագանու ամենաակտիվ անդամը՝ Գյումրու ժուռնալիստների «Ասպարեզ» ակումբի նախագահ Լևոն Բարսեղյանը, հանդես եկավ հայտարարությամբ ՝ հրաժարվելով մասնակցել բյուջեի նախագծի քվեարկությանը: Ըստ պարոն Բարսեղյանի, այն ավագանու քննարկմանն է ներկայացվել առանց հատուկ հանրային լսումների, առանց բնակիչների կողմից առաջարկների ու դիտողությունների, այսինքն` Տիմ օրենքի խախտմամբ:
Այս մասին քիչ անց:
Կարդացեք նաև
Նունե ԱՐԵՎՇԱՏՅԱՆ