Այսօր էկոնոմիկայի նախարար Կարեն Ճշմարիտյանի տարեվերջյան ամփոփիչ ասուլիսի ժամանակ լրագրողները նախարարից փորձեցին պարզել նրա դիրքորոշումը Հայաստանում գոյություն ունեցող մենաշնորհների մասին:
«Հայկական ժամանակ» օրաթերթի տնտեսական մեկնաբան Հայկ Գեւորգյանը նախարարին հարց ուղղեց` «Մեր տնտեսությունն այնքան մոնոպոլիզացված եւ օլիգոպոլացված է, որ լայն սպառման ապրանքների մեծամասնությունը մի քանի անգամ ավելի թանկ են, քան Եվրոպայում: Կարո՞ղ եք որեւէ երկրի օրինակ բերել, որը նման մոնոպոլիզացված, կենտրոնացված տնտեսություն ունի եւ զարգացել է որակապես»:
«Հետաքրքիր հարց եք տալիս, տեսական հարց է, տեսական պատասխան կտամ, որովհետեւ մենաշնորհ ասելով, պիտի նկատի ունենաք նաեւ պետական մենաշնորհը»,-արձագանքեց Կարեն Ճշմարիտյանը:
Հայկ Գեւորգյանն էլ ավելի առարկայական հարցն ուղղեց, ցույց տալով Վիեննայի սուպերմարկետներից մեկի լայն սպառման ապրանքներից մեկի գնի լուսանկարը. «Վիեննայի կենտրոնում գտնվող սուպերմարկետում բանանն արժե 88 ցենտ, այսինքն` 450 դրամ, Հայաստանում` 1050 դրամ է, ինչո՞ւ է Հայաստանում այսքան թանկ»:
Կարդացեք նաև
Լրագրողի այս հարցին Ճշմարիտյանն ասաց. «Չգիտեմ դա (նկատի ունի լուսանկարը Ն.Բ. ) որտեղից է, պարտավոր չեմ հավատալ դրան: Այդ նույն Վիեննայում, եթե դուք գնաք խանութ, կարող է բանանը լինի 5 եվրո, կարող է ինչ-որ ապրանքի հետ փոխանակել է, կարող է լիկվիդացման շեմին է, էժան է վաճառում: 50 հատ օրինակ բերեմ ինչո՞ւ կարող է էժան լինել»:
Հայկ Գեւորգյանն էլ ավելի պարզեցրեց հարցը, նշելով, ու ապացուցելով, որ մեզ մոտ մենաշնորհի ու օլիգոպոլացված տնտեսության պատճառով են լայն սպառման ապրանքները մի քանի անգամ թանկ իրական շուկայական գնից:
Ապա նախարարն ավելացրեց. «Ես չեմ ասում մենաշնորհները լավ բան են, ընդհանրապես: Խնդիրը մենաշնորհը չէ, խնդիրը դրա չարաշահումը չթողնելու մեջ է: Եթե ասենք արգելում ենք Հայաստանում մենաշնորհը… մեր երկրում ցանկացած խոշոր արտադրություն կլինի մենաշնորհ»:
Հայկ Գեւորգյանը, կարելի է ասել` խնդիրը «ծամեց ու դրեց սեղանին». ավելի պարզ բացատրելով` որ տվյալ տնտեսվարողը բանան կամ շաքարավազ է ներկրում, եւ ուղղակի ու անուղղակի կերպով արգելում է այլ տնտեսվարողներին նույն ապրանքը ներկրել Հայաստանի Հանրապետության տարածք:
Հետո նախարարը հետաքրքրվեց` «Իսկ ի՞նչ արժե Վիեննայում կոշիկի գինը. գոնե նենց մեկին այդ հարցը տվեք, ով Վիեննայում չի եղել, կամ Վ տառը չգիտի»
Մանրամասն` տեսանյութում
Նելլի ԲԱԲԱՅԱՆ
