Թուրքիայի ոստիկանները վարչապետ Ահմեդ Դավութօղլուի՝ Ստամբուլում գտնվող Դոլմաբախչե նստավայրի մոտ ձերբակալել են ավտոմատով եւ ինքնաշեն պայթուցիկ սարքով զինված հանցագործի, հայտնում է haqqin.az-ը` հղում կատարելով թուրքական Hurriyet թերթին:
Միջադեպից անմիջապես հետո մոբիլիզացվել են շրջակայքում գտնվող ոստիկանները, իսկ կասկածյալին տեղափոխել են ոստիկանական բաժանմունք: Նստավայր տանող ճանապարհը փակվել է, դեպքի վայրում սակրավորներ են աշխատում: Սակայն չի հաղորդվում, թե այդ պահին իր նստավայրում էր արդյո՞ք Թուրքիայի վարչապետ Ահմեդ Դավութօղլուն:
Միեւնույն ժամանակ CNN-Turk հեռուստակայանը հաղորդել է, որ տղամարդը ուներ պայթուցիկ ու նռնակ, եւ նրան հաջողվել է այն նետել ոստիկանների ուղղությամբ, սակայն նռնակը չի պայթել: Հաղորդվում է նաեւ, որ միջադեպը տեղի է ունեցել Թուրքիայի նախագահ Ռեջեփ Թայիփ Էրդողանի աշխատավայրից ոչ հեռու:
