Ինչպես տեղեկացրել ենք, մայիսի 1-ին Ամասիայի տարածաշրջանի 9 գյուղերի բնակիչներ ոտքի էին կանգնել՝ դժգոհելով կաթնամթերող ընկերությունների՝ կաթի առքի գինը էժանացնելուց. գյուղացիներին մեկ լիտրի դիմաց այսուհետ 170 դրամի փոխարեն առաջարկում են 150 դրամ: Գյուղացիները նեղվում էին, թե 20 դրամով էժան չեն կարող վաճառել կաթը, քանի որ տուժում են, մեկ լիտրը 170 դրամ սահմանել են հաշվարկների արդյունքում: Բացի այդ, ըստ գյուղացիների, կաթնամթերող ընկերությունները խանութներում չեն էժանացնում պանիրը, պաղպաղակը… հետեւաբար եւ անհասկանալի է գյուղացիների ապրանքը էժանացնելու տրամաբանությունը:
Նրանք ուրբաթ օրը բողոքի էին դուրս եկել Ամասիայի տարածաշրջանի Բերդաշեն գյուղում՝ հրաժարվելով կաթը վաճառել կաթնամթերող ընկերություններին: Բողոքի ակցիան կանխել էին Շիրակի մարզպետարանից՝ հորդորելով սպասել մինչեւ ամսի 4-ը՝ աշխատանքային օրվա սկիզբը, որպեսզի զրուցեն կաթնամթերող ընկերությունների հետ ու կարգավորեն հարցը:
Բերդաշեն գյուղի նախկին գյուղապետ, մասնագիտությամբ տնտեսագետ Սլավիկ Չապանյանը մեզ փոխանցեց, որ այսօր իրենց գյուղ է այցելել գյուղատնտեսության փոխնախարար Գրիշա Բաղյանը, որը գյուղամիջում հանդիպում է ունեցել գյուղացիների հետ ու ասել, որ իրենք բանակցելով կաթնամթերող ընկերությունների հետ՝ կարողացել են կանգ առնել 160 դրամի վրա:
Կարդացեք նաև
«Իհարկե, գյուղացիները չհամաձայնեցին՝ ասելով, որ ձեռնտու չէ, բայց փոխնախարարն ասաց, որ դա է մաքսիմում սահմանը: Ես առաջարկեցի, որ պետությունը սուբսիդավորի, փոխնախարարը զարմացավ, թե որտե՞ղ եք տեսել կաթի սուբսիդավորում: Ասեմ, որ դա ամբողջ աշխարհում ընդունված է, թող գնան Ռուսաստանի օրինակը տեսնեն, եթե մի տեղ գյուղացին խեղճանում է, գյուղատնտեսությունը տուժում է, պետությունը սուբիսդավորում է, իսկ Ռուսաստանում հենց կաթի սուբսիդավորումն է շատ տարածված: Իմանանք պանրի ինքնարժեքը իջել է խանութներում, ասենք՝ լավ , արի մենք էլ իջեցնենք կաթի գինը… Էսօր շատ ցուրտ էր դրսում, ես էլ տեսա, որ փոխնախարարը հարց լուծող չէ, միգուցե նա շատ լավ անձնավորություն է, բայց քիչ պատկերացում ունի մեր խնդրից, դրա համար չմնացի… Գյուղացիները հերթով լքեցին նրան, պատկերացրեք փոխնախարարն ու փոխմարզպետ Արշակյանն ավելի շատ մնացին այդ ցրտին գյուղի կենտրրոնում, քան գյուղացիները: Իհարկե, չգիտեմ այս ամենից հետո ինչ կլինի, ձեռքը ճար չկա գյուղացու, ասենք թե կաթը տանը մնաց, ի՞նչ պիտի անի… Շուկան էլ արդեն մոնոպլիզացիայի պես է, մարդիկ տեղավորվել, իրենց կլիենտներ ունեն, էնտեղ չեն կարող տանել վաճառքի:
Փոխնախարարն անընդհատ կրկնում էր, թե 160 դրամից էլ չի իջնի ու սա կրկնում էր որպես մեծ լավություն Շիրակի մարզի գյուղացիներին, ուզում էր ասել՝ շնորհակալ եղեք: Նա համեմատական էր տանում մյուս տեղանքների հետ ՝ասելով, որ մյուս վայրերում ավելի էժան են կաթը գնում գյուղացիներից: Ես լքեցի նրան՝ նկատելով, որ մեր իշխանավորները շահագրգռված չեն հարցը լուծելու: Գյուղացիներն էլ տեսան արդյունք չկա, ոչ մի բան չի փոխվելու, անիմաստ է կանգնելը, հերթով հեռացան…», -ներկայացրեց մեր զրուցակիցը:
Հիշեցնենք, որ այս գյուղի բնակիչների մեծ մասը վաճառքի է հանել իր անասունները, որպեսզի վաճառեն ու տեղափոխվեն բնակության Ռուսաստան:
Նունե ԱՐԵՎՇԱՏՅԱՆ
